RUFIERTA ARAGONESA N´A TABIERNA D´O BICO

Jueves, 04 de noviembre de 2010 a las 18:30 en el Bar Somport (García Sánchez, 34)

Ola chent, personas de bien (que lo en semos toz, fueras d'un)... Atra begada me meto en contauto con busatros ta comunicar-bos que, encara que ya ye plegada la fridor, nos tornamos a trobar en o Somport... pero en a tabierna, no pas en ixe puerto d'allá alto an que pon u cuasi pon tenemos que fer si ye que no i fican bien luego unatra tabierna, restorant, bar, chiringuito u cualsiquier cosa d'ista mena do, a lo menos, nos podamos sacar a fambre y a sete, que bi'n ha que en tenemos muita... Bueno, ya sapez que o nuestro Somport particular ye en a carrera García Sánchez, 34 y que o d'a rufierta ye o benient chuebes 4 de nobiembre de 19:30 a 21:00. Encara nos manca muito de qué fablar, muita chent a la que pelar (más que más a los que no se bi amanan). Son pasando muitas cosas arredol de l'aragonés y emos d'exerzer como buenos aragoneses, ye a dezir, fablando-ne en as tabiernas a l'amor d'unas bieras, u no?. Dimpués beluns marcharemos a fer a zena, pero nomás que beluns, os que antimás de buenos aragoneses tamién femos d'amos de casa. Pero tamién ye berdat que en que i plegan as nueu d'a nuei, ni beluns ni dengún quiere marchar porque ya nos s'ha escalfau a luenga, a capeza, o morro y tot lo cuerpo, nos dentra la calentura y... ala! l'esmo tresbatiu u lo que ye pior encara, fendo as bocadas... No sé qué mena de biodiesel nos foten en os beires que nunca no trobamos a traza d'aturar y marchar.

O caso ye que ya fa una anyada que empezipiemos cuatro rufierters mal contaus (digo mal contaus porque los conté mal, que igual yéranos más) y agora nos ha crexiu a criatura y cada begada, cada reunión en semos más y más, asinas pos que ya semos pensando en demandar permiso a o mainate d'o bar ta esboldregar bel trestallo y enamplar l'espazio. Ixo nos fa muuuuiiiiiiitiiiiismo goi, porque parix estar que a güebra ye bien parada ta replegar a tot qui quiera amanar-se-ie y recrexer o corroncho, que siempre ye millor recrexer un corroncho que no pas un entibo.

Bueno, ya sabes, a calendata, o puesto y a ora ya las he dito antis, asinas que no las repito. Las tiens por allá alto y en negreta. No i manques. Minchar igual no minchas, pero zorrupiar y arreguir-te-ne...

Ala pos, dica o chuebes. Si no charras aragonés no digas dimpués que ye porque no puedes.

Fuente: http://www.kulone.com

No hay comentarios:

Publicar un comentario