L’ORIGAMI TAMIÉN CHARRA L’ARAGONÉS

L’asoziazión cultural Ligallo de Fablans de Zaragoza inaugura os cursos d’aragonés con una besita guiada ta la Escuela Museu d’Origami en o Centro de Historias de Zaragoza o sabado 29 de nombiembre.

As lenguas minoritarias sufren a diglosia en a vida cutiana, an son alpartatas de as custions zentificas, teunicas u didauticas.

L’origami u papiroflesia ye un arte prou espezial que amanixe en Chapón y se traye ta Europa an se desembolica d’esferén traza, pero á la par.

Profes, anque puestar que l’origami se prautique tamién en una morfuga familiar, ye difízil pensar que se pueda charrar d’origami de traza natural entre os aragonesofablans porque a diglosia impide iste amanamiento.

Ista asoziazión quiere contribuyir á la normalizazión de l’aragonés prebando de presentar situazions an que se puedan normalizar bocabulario como en o caso de l’origami. No podremos dizir que os asistens sentirán una clase machistral sobre origami, pero será intresán beyer cómo ye posible adautar teunizismos dreitamén dende o chaponés, igual como fan a resta de lenguas.

Ligallo de Fablans de Zaragoza inaugura os cursos d’aragonés y con ista enchaquia quiere embitar á os alunnos inscritos y publico en cheneral á besitar a Escuela-Museo de Origami de Zaragoza sita en o Centro de Historias. (Plaza de San Agustín, 2) o día 29 de nobiembre á las 10 oras. A dentrada tendrá pré de grupo y s’imartirá un taller d’origami.

Os cursos d’aragonés ya han empezipiau, pero encara ye ubierto lo plazo ta dentrar-ie. Iste ye un buen inte ta informar-se de as condizions y enzetar astí.

Ta enamplar informazión:
Chan Baos
692 637 391 , fablanszaragoza@gmail.com