PERCACIANDO UNA FACERIA


As chens d’antismás no teneban estudios pero yeran muito agudas. ¿Que teneban una contienda?... pos feban una facería. En bi’stá muitas en os Pirineus: O Tributo d’as Tres Vacas, a facería por o de Puerto d’Estanés y l’acordanza, entre ansotanos y chesos, pa fe a Val de Guarrinza mancomunada y dejá de reñí. Y d’ixas trazas en Os Pirineus se dejoron de riñatas y pudioron seguí ta debán ...

… pero dingolondango, a moniqué, china chana, porque siguió sin apatuscá-se a contienda mas viella que bi’staba. Si, a que tien o siñó en a sesera. Si, en ixa que discurre a siñora: a que bi’stá entre os hombres y as mullés.

A contienda comencipió cuando o fatuo de Adán li dió a Eva pa minchá una mazaneta, y ella, a pobrona, anque no teneba fambre no supió decí-le que no y li fició causo. Pero, ¿porque as mullés tenemos que fe-les causo?… si solo discurren con… con ixo.

¡Ay¡, me parixe que chafarreo, pido meco, porque yo o que teneba que fe en ista fuella ye ponderá a comedia y no toma parte en a contienda pero, tien que fe-se cargo, soy una mullé y no puedo quedá-me meca anti tanto marcantón y franximán, rufos de raso porque pixan de pie... no puedo seguí ta debán, que me calo niervosa… pero tiengo que decí-les o zaguero, agún bi’stá una rayada chicorrona d’esperanza porque a Universidá de Verano de Chaca, en ista añada 2010, está percaciando una facería pa ista viella contienda entre os hombres y as mullés y, a comedia que Udz. van a vié agora, conta como van os treballos.

Posen-se, bien coflaus en a butaca, zarren os movils, ubran os oíus y alufren, fito fito, ta o escenario. ¡Ah¡ tiengo que decí-les bella coseta mas, de to o que vean en ista comedia, cualquié parixiu con a realidá ye… verdá.

13 noviembre 2010. 19:00 horas
Centro Cívico Teodoro Sánchez Púnter.
Plz. Mayor, 2. Barrio San José (Zgz.)

Elena Gusano Galindo
DINGOLONDANGO TEATRO


Fuente: Dingolondango Teatro

8 comentarios:

  1. dingolondango teatro14 de noviembre de 2010, 23:25

    Muitas gracias á FABLANS por chorrontá-nos, ye a segunda vegada nos n'imos ta Zaragoza a fe comedia en aragonés-ansotano y ya sabez que no ye cosa facil.


    Dingolondango teatro

    ResponderEliminar
  2. Os qúe vié-mos ista comedia nos fizió muito goyo no solo por vié-la en Zaragoza, sino tamién por o treballo que fan istas chens d'Ansó por aduyá a mantené viva a luenga d'a Val suya. Yé menisté vié que farán en o futuro os de DINGOLONDANGO TEATRO, dimpués de "Yésica, un abrio d'agora" y d'ista zaguera comedia d'a que charramos.
    Aguarda-mos vié-la en otros lugás, como Uesca y tamién en Chaca, que ye a capital cultural d'isas Vals pirenencas.

    ResponderEliminar
  3. dingolondango teatro15 de noviembre de 2010, 0:35

    Chuan, se veye de do yes.
    Gracias por vení a vié-nos en Zaragoza y decí-te-ne que a nusotros tamién nos faria muito goyo fé a comedia en Chaca pero... no nos claman. Cuando charramos con a Comarca siempre tien o programa pleno, si ye ivierno nos dicen que pa o verano, y si ye verano que pa o ivierno... asina una añada dezaga d'otra. Me parixe que no lis cuacá-mos... debe sé que tenemos a nariz una miqueta gran o que mesio

    Dingolondango teatro

    ResponderEliminar
  4. Ola, Dingolondango.
    Iste blog ye de busatros ta cuan queraz. Asinas que si amenistaz dizir cualquisier coseta d'as obras de teyatro o de atra que os faga goi, ya sapez an semos.

    esprisions

    ResponderEliminar
  5. Ye menisté fé cosetas como as que fez busotros, chuní as chen d'o lugá con o fuso de torzé d'a comeya, calando l'ansotano en una cabañeta callén. Asinas que muita rasmia y ta Chaca, que a capital d'a Comarca tiene que sentí charrá de mastos y de fembras (más de mullés..., pero bueno). Óscar

    ResponderEliminar
  6. Oscar y Chuan: Gracias por aganá-nos pa seguí ta deban. Floriu no bi'stá cosa y nusotros, como chen d'os Pirineus, somos guitos y una miqueta machacas asina que tene-mos que seguí cerdoniando con yi ta Chaca... ye una soñera que quere-mos fe realidá pero, ixo si, no pensamos opera-nos a nariz pa fe-la mas curta.

    Dingolondango

    ResponderEliminar
  7. Con o bien q lo fez y l'esito que hez teniu en toz os puestos en os que hez feito Yesica y, agora, Percaciando una facería, no me puedo creyer que agún no hayaz representau en Chaca. E ixo, de qué coda?
    Pilai

    ResponderEliminar
  8. En Chaca fan muito teyatro aficionau: a Cuadrilla d'Oroel, os escolanos d'o instituto -que lo fan en francés-, os escolanos d'a escuela de mayorencos y nos parixe muito bien pero a nusotros... no nos claman. Ista añada pensa-mos pedí-li-ne a os reis bruxos y como hemos siu güenos ... a fe que Dios¡ fare-mos comedia en Chaca. Pa aduyá á os reis, pensa-mos mandá ta Cultura un güen "book", con a historia nuesa.
    Dingolondango

    ResponderEliminar