PLEGA LA NABIDÁ EN A BOTIGA DE FABLANS‏


Ola á toz y todas:
Asabelas de cosas cal que tos contemos en istos diyas que bienen fartos d'emozions, remeranzas y compromisos. Intes cosmicos que, queramos que no, nos embitan/obligan á dentrar en o ibierno, a parti de l'añada en que nos miramos más t'aintro. Intes que aprofeitan as superfizies granizas ta fer su "agosto", pero no pas nusatros.

Continamos (ixo sí) enamplando o catalogo en abotiga.com con treballos como:

-Eugenio Gracia, Chitos. Un mosico que, fito fito nos ha amostrato cómo suena la gaita de boto aragonesa (y o saxo) en La Orquestina de Fabirol y Ixo Rai! u Comando Cucaracha, más que más. Alcompañato con amigos de tanta calidá mosical como a suya mesma. Buena grabazión de Luna Nueva.
Ta beyer o disco preto “Chitos” puncha aqui.

-Os chotos, Abril ye transparent. Os d'Embún no aturan pas. Con una formazión esbiellata han grabato en os estudeos Kikos de Zaragoza iste treballo que apunta á estar tan "fino" como os atros dos que en tienen.
Ta beyer o disco preto “Abril ye transparent” puncha aqui.

-Arundo Donax. La caña en Aragón. Pues no, Arundo no ye un siñor saputo espezializato en cañas. Ye o nombre zientifico de as cañas que beyemos alcanto de os ríos nuestros. Iste decumento escrito contiene tot que s'amenista saper sobre ista planta alazetal en o mundo no pas industrializato, tamién en Aragón. Se i completa con un DBD con as charradas, gambadetas y conziertos d'aquellas chornatas en o Baxo Martín con Nacho de Tremol, Javier Pasariño u Eliseo Parra. Alazetal ta lutiers, mosicos de pita, antropologos y chen en cheneral intresata en os costumbres nuestros.
Ta beyer o librez “La caña en Aragón” puncha aqui.

-Solo que ta Zaragoza (y redolada), A botiga de Fablans ufre Troncas de Nabidá de berdá. La te lebamos ta casa y en un DP t'esplicamos cómo apañar-te ta que en casa tuya cague a Tronca, anque no tiengas fogaril. As Troncas coleutibas serán anunziatas, pero puedes escribir á zaragoza@fablans.org ta rezibir info puntual. Si quiers contratar una coletutiba (eszenario de 6x2.5m) clama-nos/escribe-nos.
Ta beyer como ye a “Tronca de Nabidá” puncha aqui.

Tamién tos embitamos á todas y toz á besitar a Feria del Libro Aragonés que comboca cada añada a Institución Ferial de Monzón. A botiga nuestra será astí y podremos atender-te con o mesmo goi que cutio. Si tiens intrés por bella cosa, fenos-ne saper y podemos lebar-la-te riserbata. Bi ha tren dende Zaragoza por 5 Euros o domingo. Consultar en a web suya ta estar más informatos.

Mos beyemos/leyemos/sentimos.


Chan Baos.
A botiga de Fablans
abotiga@fablans.org www.abotiga.com y http://abotiga.wordpress.com
Facebook: "a botiga de Fablans" - Skype: "Ligallo de Fablans de Zaragoza"
Coso, nº112. Zaragoza - Telf. 976 231 299 y 692 637 391

No hay comentarios:

Publicar un comentario