SINOPSIS D'A XIV BORINA POR L'ARAGONES.

Un año más una buena manada de chen mos achuntemos ta zilebrar a borina por l'aragonés, parada de conchunta dentre Ligallo de Fablans de Zaragoza y l'asoziazión Nogará-Religada.

Dende istas linias queremos agradexer a colaborazión d'as collas partizipans Ixera y Cachirulos XL y tamién á os anfitrions de Casa Lambrote, que mos fazión sentir como en casa nuestra. Muitas grazias ta els y ta toz y todas que queriez alcompañar-mos y refirmar l'aragonés con a buestra presenzia en iste auto.

Tos alchunto copia d'o manifiesto por l'aragonés que se i leyió:

Biemplegaus y biemplegadas en ista catorzena borina por l'aragonés. Una añada más mos achuntamos a chen que esfendemos l'aragonés en a ziudá de Zaragoza, arroclaus por as asoziazions Ligallo de Fablans y Nogará-Religada, y emos de tornar á demandar a protezión y ofizilidá d'a luenga aragonesa como trangos alazetals ta guaranziar a suya perbibenzia.

Fa ya más de dos años que s'aprebó a Lai de luengas, que reconoxe l'aragonés y o catalán como luengas propias d'Aragón, pero poco u cosa s'ha enantau en tot iste tiempo. Encara semos aguardando o suyo desembolique. Encara semos aguardando que se creyen as academias ofizials, que se delimiten os territorios lingüisticos, que l'amostranza de l'aragonés sía una reyalidá en as escuelas, que l'almenistrazión incorpore as tres luengas en o suyo treballo cutiano, que se retulen y normalizen as denominazions tradizionals d'os nuestros lugars, ríos, bals u redoladas, que a radio y telebisión autonomicas programen a suya parrilla tamién en aragonés...

En cuentas de fer-se tot ixo, agora se nunzian retalles en o suyo radiu testo u mesmo a suya derogazión, con escusa d'a supuesta "imposizión" sobre a comunidá castellanofablán mayoritaria. Y se torna t'o discurso d'enfrontinazión d'as luengas, como si en cuentas d'estar una riqueza y un tresoro, erenzio d'os nuestros debampasaus que emos de fer plegar en as chenerazions futuras, estasen un problema ta l'entendimiento d'a chen y quemisió d'una custión politica ta os nazionalismos d'uno u atro costau.

Por ixo emos de continar luitando por a reconoxedura d'a luenga aragonesa como parti alazetal d'o nuestro patrimonio cultural y ta ixo amenistamos d'o refirme de toda la soziedá aragonesa. Cal espardir a conzenzia de que l'aragonés ye de toz y todas, no nomás d'os que lo charramos por tener-lo como fabla materna u por melitanzia. Fer-lo bistero, normalizar o suyo emplego, estendillar-lo en as nuestras relazions presonals ye a millor traza d'empentar en ixa endrezera.

Y cal, agora más que nunca, que en ista baralla siamos toz chuntos, superando os egos y malquerenzias presonals que no fan garra onra ta l'aragonés. A nuestra deseparazión ye o nuestro pior enemigo, más que no os que mos innoran u mos fan de menos debán d'a unica luenga ofizial. A unidá ye a nuestra fuerza, y ista borina ye un exemplo de que, por denzima d'as diferens opinions de cadagún, tenemos o mesmo ochetibo y a mesma delera.

Y ya ye prou de charrar, que contine a borina... entalto Aragón y entalto l'aragonés!

Chuanchu Pérez,
Cordinador d'Animazión y Autibidaz