SEGUNDO CABO D'AÑO D'O BLOG

Con más d'un mes de retardo, a la fin tiengo un poquet de tiempo ta fer una chicota cronica d'ista segunda añada d'o blog de Ligallo de Fablans de Zaragoza. Y digo más d'un mes porque o cabo daño d'o blog estió lo 13 de Marzo.

Iste segundo trango podría estar como l'añada d'a consolidazión, ya que o blog sigue entadebán en a suya endrezera de dar a conoixer l'autualidá que chenera cualsiquier entidá que se chira arredol d'a luenga aragonesa y d'achuntar-las en un solo puesto. Fendo fincapié en ista conzentrazión, o Blog de Fablans Zaragoza replega, publica y esparde as autibidaz y notizias sin d'eszepzión, de totas as asoziazions, estudeos, roldes, consellos y academias que treballan por, ta y sobre l'aragonés. A rechira, pues, no la femos por lo bistero de a notizia, por a prozedenzia u mesmo por a calidá periodistica d'o testo que la i alcompaña sino por a importanzia d'estar espardita ta os intresatos en a lengua que i esfendemos. A pluralidá que prebamos d'exerzer biene por no fer una triga ideyolochica ni partidista, con rispeto a totas as opinions, mesmo a las que no i compartimos, que tamién bi amanixen.

De feito, semos asabelo de leyitos. O blog de Fablans Zaragoza cuasi aconsiguió en a segunda añada a zifra de 41000 besitas. Una zifra muito digna de tener en cuenta y que atra begada nos diz que marchamos por buen camín, encara que podemos seguir amillorando

Tamien semos obligaus a continar moderando os comentarios, porque as esferens embistas nos aduyan a costruyir, pero ta reñir y dizir jautadas ya esisten pogramas en a tele más espezializatos en rufiertas que iste blog. Prebamos que os leutors beigan comentarios de personas que tienen gana de costruyir y no d'espaldar.

Arredol d’os temas trataus en o blog, dengún no ha sobresaliu por denzima d'a resta, como si ocurrió en a primer añada con os catens pleitos sobre as ortografías. Encara s'escriben chicoz pleitos en os comentarios de bels articlos terne con o mesmo tema. Amás d'o marabilloso articlo que nos nimbió Lluís- Xavier Flores Abat “A zaguera oportunidat ta un idioma agonizante: l'Academia d'a Luenga Aragonesa”, como dentrada mas bista destaca l'anunzio d'as clases d'aragonés d'ista añada de Fablans “Cursos De Luenga Y Cultura Aragonesa 2011/12”, anque tiene trampa porque cuenta con enristre propio en o prenzipie d'a pachina.

Igual como tos dizié ya l'añada pasada, remerar-tos que iste ye un blog ubierto ta qui quiera. Puyaremos os testos que i plegen si cumplen una calidá menima. Semos a la disposizión de os nuestros leutors en iste enristre

GRAZIAS POR LEYER-NOS

Antonio Brosed
Redazion d'o blog de Ligallo de Fablans de Zaragoza

1 comentario:

  1. Muitismas grazias a busatros por o treballo. Ye alazetal y, ta yo, una dentrada obligada en internet.

    ResponderEliminar