UNA NUEI LARGA TA LA CULTURA ARAGONESA

O fuego ye importán en Aragón. Por toda la corona beyemos binclos culturals con o fuego, que crema lo malo ta tornar-lo en bueno, que esbiella lo que no bale, que ye un tornar á empezipiar. Nabidá y San Chuan son os simbolos cristianizatos que zelebran os solstizios, perén con fuego.
Ye una pena tener que cremar una segunda lei que ye pior que a primera. Tanto espanta un Aragón trilingüe? Tanto costaba reconoxer lo cultural sin dentrar en a politica? Quí nos considera menos españols por charrar más lenguas?


Pretamos fuego una lei de lenguas que s'arrigue de as personas que encara no han aprendiu a pensar en castellán, de as que treballan firme por os dreitos de toz os aragoneses y por los que preban d'amostrar a cultura aragonesa en atra lengua que no ye o castellán. Á la fin, de tot o planeta Tierra porque ista nueba lei puede poner en as tres pedretas una parti de a cultura mundial.

Y digo "puede poner". Garra lei consigue lo proposato si o pueblo no enquiere. A lei xuta en Norteamerica no consiguió que os norteamericans dixasen de beber, a lei de tresparenzia no consigue que beigamos en qué se gastan as perras publicas. Ista lei de lenguas puede conseguir que quienes
tiengamos sensibilidá por a cultura aragonesa nos achuntemos y, "difuera de a lei" rebiscolemos (primero nusatros) a nuestra cultura, no ta nusatros, sino ta o planeta Tierra.

Dentramos en una epoca más fosca encara, en una nuei que parixe ba á durar un tiempo. Bueno, á una mala, feremos chileras.

Chan Baos,
Presidén de Fablans Zaragoza.

No hay comentarios:

Publicar un comentario