NAIXE A PLATAFORMA “ESFENDEMOS AS LUENGAS”

En o diya d’ahiere se presentó a plataforma “Esfendemos as Luengas”, que naixe con a sola fin de continar creyando espacios t’a espardidura de l’aragonés y o catalán, amás de denunciar as continas enrestidas que sufren istas luengas minoritarias por parti d’as institucions publicas, organizacions socials y politicas u d’os meyos de comunicación.

Dende Esfendemos as Luengas sinyalan que a zaguera Lei de Luengas aprebada iste 9 de mayo por o Gubierno d’Aragón, formau por PP y PAR, en a qual cambean de traza oficial o nombre d’aragonés y catalán por LAPAPYD y LAPAO, no ye mas que unatro intento d’acabar con una reyalidat lingüistica, d’a qual organismos como a UNESCO han exichiu a protección y divulgación d’istas luengas.

“As continas manipulacions y adoctrinamiento en toponimia u denominacions d’as luengas, as declaracions amagadas, as risalletas u o desconoixmiento scientifico son una constant en os meyos, exposicions u declaracions institucionals“

Entre a presentación, emitioron un video en o qual a plataforma Esfendemos as Luengas denuncia l’actitut levada acabo por os meyos de comunicación aragoneses. Destacando a posición prenida por a televisión autonomica “Aragón TV”, a quala plega a ridiculizar istas luengas, mesmo arribando a negar a existencia d’o catalán y l’aragonés.

A plataforma “Esfendemos as Luengas” ha quiesto fer un clamamiento a todas as personas que quieren treballar por un Aragón trilingüe, do l’aragonés y o catalán se reconoixcan como luengas oficials y en a qual se remate con ista persecución institucional y mediatica de totz os que charramos istas luengas.





Por meyo d’iste video queremos fer present, dende a recient enguerada plataforma “Esfendemos as luengas”, un puyal d’inchusticias que se cometen a sobén con as luengas minoritarias d’Aragón. Una plataforma que se probará a denunciar todas as enrestidas a las nuestras luengas minoritarias: catalán y aragonés, dende qualsiquier institución u organización, por qualsiquier meyo d’información u de qualsiquier traza.
Feremos una cursa por os dreitos más fundamentals, comunment incumplius en os meyos de comunicación, más que más a canal publica Aragón Tv.
Pero que, tal y como “Esfendemos as luengas” se mirará de informar-ne, no son actitutz exclusivas d’ixa canal, sino que por un regular amaneixen en editorials, radios, periodicos,… u toda mena de meyos navegaus mientres anyos por intreses politicos amagaus:
  • O tracto ascientifico y politizau d’o catalán en Aragón, en comparación con atras canals como TV3, aon que a existencia d’atra luenga minoritaria como l’Aranés no i adhibe garra problema. O mensache d’incherencia u imperialismo catalán, ninviau dende bells sectors politicos, no ye asinas entendiu en o tractamiento d’un caso parellano dentro d’as suyas mugas.
  • Reyalidatz amagadas do l’aragonés ye present difuera d’as nuestras mugas, como os exiliaus franceses d’a Guerra Civil. No reciben o mesmo tracto dende qualsiquier meyo d’o nuestro arredol, a vegadas acusaus de nacionalistas, pero con una sensibilidat lingüistica a rans muit superiors.
  • A manipolación y transformación d’o lexico aragonés en os programas en castellano ye un firme sinyal d’os meyos de comunicación aragoneses, que a vegadas se autoproclaman como autoesfensors d’as variants u peculiaridatz,…pero que tienen como faina fixar o lexico castellano poco espardiu en Aragón. Parolas como “aranyones”, “rebollón u robelló“, … son correchidas de camín por as suyas sustituas castellanas “endrina” y “níscalo“.
  • A ridiculización y vulgarización de qualsiquier comentario en aragonés, tiene a maxima fuga con a simple eliminación en os noticiarios de Aragón TV. Noticiarios controlaus por sectors politicos que dicen esfender a libertat pa charrar en lo que se quiera.
  • L’asimilación de l’aragonés por parti d’o “Espanyol d’Aragón” y a suya manca de rispeto en no fer servir nunca a parola “Luenga aragonesa” y/u “luenga catalana” ye norma común en totz os programas d’a canal publica.
  • Mesmo l’humor emplega l’aragonés como un trocet y una particularidat d’o castellano en Aragón.
  • cultura en Aragón siempre ha deixau a un costau as luengas minoritarias, y dende fa bells anyos politicos amanaus a o PP van fendo tranya con os suyos postulaus espanyolistas. Espardindo historias irreyals sobre a magnitud d’a luenga castellana y a falsa implicación d’a Corona d’Aragón en ista fayena.
  • Directors chenerals de cultura como “Humberto Vadillo” se fan a mofla d’as luengas minoritarias en a suya consellería, y evitan parlar-ne en actos publicos como as entregas de premios que a posteriori han eliminau “Guillen Nicolau” y “Arnal Cavero”.
Fuente: http://arainfo.org y http://esfendemosasluengas.wordpress.com/

6 comentarios:

  1. Ye un chenozidio cultural muito bien planificato, que quiere esborrar tot siñal de l'aragonés. Aragón Televisión ye una telebisión imperialista, que luita por una total castellanizazión en Aragón, que s'arriga de l'alma d'Aragón, que ye a suya luenga. O poder establito ye una maquina chenozida perfeuta. Somos bitimas d'un chenozidio cultural, asinas de claro, e sin que Europa diga e faiga lo que cal que diga e faiga, sin que nos esfienda d'a barbarie faxista.

    ResponderEliminar
  2. Muito video, muito texto rayato y muita carranyadura........pero......istos quí son?

    No bi ha garra sinyadura por dengún puesto, ni de presonas, ni asociacions, ni partius politicos, ni pon.

    Creigo que ye una d'as primeras cosetas que teneban que fer publico.

    ResponderEliminar
  3. Todas estas iniciativas no valen ta cosa. Son fetas dende Zaragoza u Huesca y no cuentan mica con es que charran de cutio l'aragonés. A els les bufa la pocha la lei de lenguas y que l'aragonés sia en las tres pedretas. Continamos fendo la casa pe'l tellau, y lo piyor, no querremos danos en cuenta...

    ResponderEliminar
    Respuestas
    1. Ye a trista verdat. Ni sisquiera un concello de l'Alto Aragon ha tartiu en cuentra d'esta lei. Án son os charradors patrimonials de l'aragonés? Si lo menos os d'Echo u Chistau u Benás protestasen bel poquet, pero no, no mos enganyemos, defuera d'as asociacions de Uesca e Zaragoça no bi ha garra reaccion cuentra la nueva legislacion. Me vienen ganas de dixar d'esfender esta luenga e dixar-la morir, que ni sisquiera eutanásia hi seria, perque seria una muerte indigna de tot. Pero ye o que os suyos charradors deseyan. Ye a trista verdat.

      Eliminar
  4. Ya sé que dicir esto no ye popular. Pero como lo pienso, asinas lo digo: he visto añada zaga añada cómo l'aragonés popular va morindo. Yo creigo que ixe proceso ye irreversible. Si l'aragonés tiene bel esdevenidero ye en una lengua estándar, que precisamén o poder politico no puede ni veyer, no en quiere ni sentir fablar. Reaccionan ixos que aiman l'aragonés, anque no sigan charradors "patrimonials". O futuro de l'aragonés ye en o estándar, as variedaz son morindo, belunas cuasi son muertas y no van a tornar charrar-se, como lo belsetán. Pensar y devantar poquet a poquet un aragonés estándar no ye devantar a casa por o tellau, ye meter os alacez pa una nueva reyalidá. Y o día que a chen d'ixas asociacions, d'ixas chens que emplegan o estándar, anque sigan pocas, pierdas as ganas y se desmoralicen, ixe día sí que l'aragonés morirá. Esto lo diz belún que ha visto cómo en o suyo lugar día zaga día s'han iu perdendo palabras, espresions.... Y yo este proceso de perda lo veigo como irreversible. Ya sé que a mayoría no i ye d'alcuerdo, pero asinas lo veigo. O futuro ye en o estándar... u en dengún puesto.

    ResponderEliminar
  5. Es suyos charradors ni les va ni les viene. No tienen una concencia clara lingüistica diferenciada. Ye el resultau de 30 años de democracia sin una politica educativa lingüistica como cal dende la Diputación Cheneral d'Aragón. La chent que no conoix la suya cultura no paran cuenta d'ella. Es intentos que se fan dende Zaragoza y Huesca dende las asociacions rematan toz en es mismos pecaus: son artificials, politizaus y no sinificativos ta la población que encara charra. Si ancaso consiguen la contra, que encara le prenen més tirria es talibans monolingües y el refusan es propios fablants. Si se quiere bela cosa, cal pensar que la base ye que es patrimonials quieran conservar la suya lengua. Cuan ixo se consiga, y sian els es protagonistas y es que deciden el suyo futuro y normalización, alavez igual i habrá una posibilidat ta l'aragonés.

    ResponderEliminar