TENEMOS ACADEMIA!

Por si belun encara no s'ha enterau (¿A on vives moceta?), ya ye nombrada l'academia (oficial) d'a luenga aragonesa. No sé si ya ye publicau en o BOA, que ye quan será de verdat oficial, pero, por lo que yo sé no pareix que vaiga a haber-ie cambios. O listau d'as academicas lo tenetz, chunto con un chiquet comentario d'o CV de cadagún en o blog de Fablans Zaragoza y en Lo finestró del Gràcia. Asinas que, encara que un poquet tardi, creigo que toca fer valuracions.

Encerté y m'entiboqué. Encerté quan dicié que, si se nombraba una academia que no estase lo Consello Asesor, apareixerían trolls por tot internet decindo que l'academia pude, que ye d'o PSOE y, como no, que bi ha una man catalana dezaga. Os mesmos que no reconoixeban a l'EFA como academia por no estar nombrada por o gubierno, agora cretican a la nombrada por o gubierno. Trolleando, más que más, por o blog de Fablans Zaragoza (parabiens por o primer cabo d'anyo, continatz con ixa sobrebuena faina!). M'asperaba lo d'o PSOE y que no reconoixesen u se caranyasen si se nombraba una academia asinas, pero lo d'o catalán, me carranya y me cansa a partis iguals. Prou que buena cosa de culpa la tienen os nagorianos por a fatera ixa d'o "marco de seguridat con o catalán" (sic) por lo de fer servir "ny" en cuenta de "ñ". O "marco de seguridat con o castellano", luenga a la que sí que ye chusmesa l'aragonés pareix que no les preocupa tanto...

Tamién m'entiboqué. Levo prous meses, dende que s'aprebó a lei de luengas, que no caleba asperar a que o gubierno nos fese lo treballo, y contino pensando igual, que no cal asperar-lo. Pero si lo deciba ye, entre atras cosas, porque no creyeba que s'ise a fer cosa antis d'as eleccions, ni dimpués quan o PP gubierne Aragón. Pues ixo, que m'entiboqué. Tenemos academias y pareix que prencipiarán a treballar antis d'as eleccions. Millor ta todas, me pienso.

Cuanto a qüestions legals, cal aclarir, que o numer de academicas potencials ye de 21. Y digo potencials porque con isto bi habió bell empandullo informativo. Agora bi ha nueu academicas d'a luenga aragonesa, pero seguntes os nombramientos podría plegar a estar-ne vintiun. Ixo podría cambiar prou a composición y os porcentaches que i tienen as diferents sensibilidatz tocant a l'aragonés. No sé como son as ordinacions de l'academia, asinas que no sé quanto durará ista formación que bi ha agora. Si se puet enamplar, sustituyir bell miembro u qué puet pasar en o futuro amanau. ¿Podría o PP meter a dotze matutans que decisen que l'aragonés ye dialecto d'a castellano u qualcosa parellana? Que me se yo.

Pareix que tampoco no cobrarán cosa, talment dietas, ixo no lo sé. Pero cal aclarir-lo, que tamién tenemos os trolls espanyols malmetendo cada vegada que apareix una noticia en os "meyos grans" (Heraldo y Periodico). Que si "que de malfurriar diners!", que "i son soque ta pillar bien de diners", y asinas asinas... Pues no, manyo. Dengún no va a vivir d'isto. Como muito ta bosar a bencina, que muito viven luen de Zaragoza.

Tocant a la composición que ye o más important: bi ha cinco amanaus u d'o EFA, tres amanaus u d'o CFA y Marisa Arnal, d'a Universidat, que pareix que ye contraria a la G.87. Tot isto porque me lo han dito, que a beluns no los conoixco, u a lo menos no conoixco as suyas opinions. Asinas que pareix que si l'academia diz de meter una grafía oficial ta l'aragonés, y cuento que habría d'estar lo primer que faiga, se decidan por a d'o EFA, u a lo menos, por beluna parellana. Ya he dito, en publico y en privau, que me pareix que bi ha cosas mas urchents, pero si deciden una grafía ya serán todas as cartas sobre a mesa. Ya no servirá lo de "cal asperar a una academia nombrada por o gubierno" y tot ixo. Y prou que, cuento que como a todas, me surte a dubda. ¿Qué ferán as G.87eras si se decide una grafía parellana a la d'o EFA? ¿La ferían servir? ¿Se declararían insemisos? ¿Deixarían d'escribir? ¿Dimitirían Nagore y cía? Lo tiempo lo dirá... La mesma pregunta de revéssi se dase a sospresa y l'academia se decidise por la paleomoderna (cucada de huello ta Florencio) G.87. Yo, ya digo que, con muito penar, la tornaría a fer servir.

Prou que todas hesenos trigau una academia esferent. Diz que, en Espanya, todas son seleccionadoras nacionals, y cadaguna levaría once chugadors esferents t'os partius d'Espanya. En fablilandia pasa lo mesmo. Todas hesenos trigau una atra academia. En a mia opinión bi ha chent que i sobra y chent que i falta, pero no me pareix una decisión mala a composición, y me pienso, que ye un retrato, alto u baixo bueno, de fablilandia, con todas as suyas sensibilidatz, fueras d'a SLA, que s'ha quedau difuera, encara no sé guaire bien porqué.

Asperemos que ista academia faiga camín y honra ta l'aragonés y que cumplan con o suyo quefer que ye dignificar, normativizar y fer espardir ista luenga. Que no ye poco!

Fuente: http://barrenau.blogspot.com/

9 comentarios:

  1. Dó ye l'academia, que yo no la trobo?
    y si cal escribir como diz o EFA, millor fer serbir "uello" en cuentas de "huello" (si mal no remero en latín yera "oculus")

    ResponderEliminar
  2. Ye que EFA diz que cal escribir "uello". Si quan charrásenos sabésenos qué decimos :-)

    ResponderEliminar
  3. sobre lo de uello, estió una error, ya la he correchida en l'orichinal...
    Sobre l'atro: ¿ein?

    ResponderEliminar
  4. Ya ye prou de personalismos. Ista academia ya ye a ofizial, asinas que agora cal fer-le caso y prau. O feito de que seiga parellana a o EFA parixe indicar que o II Congreso lo fazió bien, pero agora ya ixo rai. Dimpués de muitas añadas, tenemos una academia ofizial, asinas que cal parar cuenta y continar treballando.
    Entalto l'Academia d'a luenga aragonesa!

    ResponderEliminar
  5. Que bergoña me fa leyer isto!!! ya ye prou de criticar a una presona tan respetable e importan como ye Francho Nagore. De berdá no se como en Ligallo dixaz que escriban istas cosas,porque que se sepa que en a zaguera chunta SE FIRMO QUE A FEDERAZION DE FABLANS CONTINARIA EMPLEGANDO A GRAFIA DE O 87 DICA QUE RO GOBIERNO UFRIERA UNA ATRA. Isto ya pude!
    Profes que ro que diga ra academia será ro esfinitibo, pero a yo me fa muito duelo que charrez d´istas trazas da primera presona que fazio y treballo por una gramatica del aragonés

    ResponderEliminar
  6. Ye cierto que Fablans ha decidiu fer servir en os suyos escritos oficials a ortografía de lo 87, pero rispetando a opción presonal de cadagún.
    Yo siempre he dito que lo EFA no yera l'Academia porque no teneba refirme oficial y muita chent de Nogará ha veniu fendo lo troll en os foros y blogs en contra de yo por dicir isto.
    Agora bi ha Academia y s'ha de rematar o debate en Fablans: toz debemos estar a lo que diga l'Academia.
    M'alegro que "Tierra de Barrenaus" afirme que si l'Academia optase por a ortografía de lo 87 tornaría a escribir con ella, yo fería lo mesmo, aspero que lo EFA faya publico un comunicau dicindo isto tal cual: que renuncia a ser autoridat lingüistica y que reconoxe, sin de condicions, l'autoridat lingüistica de l'Academia de l'Aragonés.
    D'atra man, yo tamién he parau cuenta de que se puede enamplar l'Academia, belún deciba aquí que por cooptación: o Consello Superior puede nombrar más miembros. No creigo que o PP metese 12 macatrullos ta endizcar: le daría problemas una Academia que agora mesmo no le pide pan.
    Pero podría dar-se o caso de que, zaga las eslecions, un hipotetico gubierno endrezau por o PSOE con participarción de CHA, apachasen "dar-le" a la CHA l'Academia y que o gubierno fese ceprén sobre o Consejo Superior ta que nombrase tres u cuatro academicos de a cuerda de Nagore ta fer-le pintacoda a l'Academia y imponer con a suya mayoría la ortografía de lo 87.

    ResponderEliminar
  7. El "ya" no existe en aragonés
    ya ye ?, si, de paso... ya ye yi yo yu
    Pa fer a grazieta, clar (desincusas
    o mio castallán, chapurriau):
    La colla de S.oziedá(t) L.A. me parixe molt/mui válita..e as suyas reflisions. Flexiblidá(t), correuzions e alportazions...

    En 1979, o CFA charraba de "aragonés mudern/o", presonalmén agora se fa, "contimporanio"?
    (ante resteurazión)

    Viurer "o meu" post -"progresíu ao modern"-
    Caldría una "descastellizazión" azentúal e verbal (conchugazions),+ (terminazions -os por exemple)+ á desterrat, muitas cosetas més (boca-vulari).... e si, pénso en dople camín, l´aragonés literario escrit e dimpues quiera´l charrar a chen n´a carrerra

    ResponderEliminar
  8. Pos agora cada begada que quiera dizir bella cosa en aragonés tendré que preguntar á busté si ye u no ye aragones, ya beigo que cada diya bi´n ha más de academicos. Olá, pero si ya ye no ye aragonés, como se diz en aragonés? Ye que soi muito fato. E tamén atra coseta, quí diz que ye u que no ye aragonés? Tú? U será la chen que lo charra e ye que yo ascuito muitas begadas ya ye! Yo que creyeba que una luenga la fan as chens que´n charran e no lo que a belún li fa u no fa goi! Desincusame por as mias entobocazions que serán muitas, bueno a lo millor no, por que a lo millor seguntes beluns no soi charrando en aragonés sino en...???????

    ResponderEliminar
  9. O mío aragonés no ye perfecto... pero yes seguro que ixo que charras tu ye aragonés? Puestar que qui ye entibocau sigas tu. Qué te fa pensar que "l'aragonés" que emplegas tu ye 100% correcto y que tot fueras d'ixo no'n ye?
    Bajate un poquico los humos (si, si, "los humos", "las humas", "les humes" y "lus humus" no son aragonés, por ixo he meso ixa expresión en castellano) y a esfruitar d'a nuestra luenga

    ResponderEliminar