Quiestos/as ligallers/eras
Como bien sabrez, o pasau sabado 19 de marzo bi abió asambleya en o nuestro Ligallo y en ella s'esbielló o cargo de presidén y se trigó un bize-presidén, cargos que agora ocupamos yo mesmo, Víctor, y Chesús Grazia, respeutibamén.
Os dos queremos dar, en primerías, as grazias a l'asambleya por confitar en nusatros y aber-nos dau o suyo refirme. Os que bi estiez ya nos conoxez y sabez de primera man o que queremos u pensamos fer. A os que no bi estiez u no nos conoxez, només dezir-bos por agora que puet estar que as cosas surtan bien u no, pero que en cualsiquier caso no ha d'estar por manca de treballo u ilusión, que ye o que nos sobra. Ye una ilusión que queremos tresmitir-bos tamién a busatros ta que, entre toz, contiemos fendo un Ligallo fuerte y que ocupe o puesto que li pertoca, por istoria y prestichio, en Aragón. Contamos con que nos aduyarez a consiguir-lo. Ta poqueta chen ye un treballo bien furo, pero si lo femos á ixena de seguras que ha de resultar más fázil.
Rematamos dando as grazias tamién a la chunta directiva salién, encabezada por Álex como presidén, por aber lebau as riendas de l'asoziazión en un inte de cambeo y bien complicau. Asperamos continar contando con a suya colaborazión.
Ya bos iremos escribindo y contando-bos os nuestros plans y os nuestros deseyos. Entremistanto, replegaz un fortal abrazo
Presidén y Bize-presidén d’o Ligallo de Fablans de Zgz.
No hay comentarios:
Publicar un comentario