Quiesta amiga/o:
Tornamos ta la bida reyal, tamién en a Botiga de Fablans, pero chino chano, sin prisas.
Dimpués d’un tiempo sin tener ubierta a puerta fesica clabamos a clau en o zerrullo ta fer limpia y dar buelta por a siede, á bier qué cosas bi ha nuebas.
En ista segunda temporada de abotiga.com prebaremos de dixar retebuenos os recursos que internet nos ne ufre ta retabillar informazión clasificata: En ista demba, prebaremos de fer presenzia en facebook. Éscanos como “A botiga de Fablans” y fe-te amigo nuestro. En abotiga.wordpress.com podrás beyer as zagueras nobedaz, ferias en que seremos y atras cosetas.
Anque en a web solo permite que bosar contrareempoche, á beyer si estiaño conseguimos poder sacar os pitorros de bosar por trasferenzia, paypal, visa u atras custodias.
L’orario de a botiga fesica será de 10 á 13 y de 17 á 20. Lunes de maitins, trancato. Sabados maitins con zita prebia. Gosamos estar-nos más rato astí, con que si amenistas benir en atro orario, mete-te en contauto con yo y prebaré d’estar-ie.
Charrando con os Chotos d’Embún me dizen que o preto suyo s’arrezaga dica abiento (alto u baxo), con que caldrá seguir asperando una mica más. Pazenzia.
Más pazenzia con o material con que son fendo mezclallos os amigos de Luismi Bajén. Biella Nuei, de conchunta con Azawan presentará en o Pilar iste treballo, que mos pensamos que se meterá á la benda por ixe inte.
Pero bella cosa que sí puedes mercar: Músicas para instrumentos tradicionales, de Bals Coscollar y os Dulzaineros del Bajo Aragón. Libro con testo, partituras de Blas y un DBD (disco bideo dichital) an que puedes sentir a mosica de as partituras tarcual u trigar os estrumentos que quiers sentir. Una chulada con presentazión de luxo. Beyer asti
Tan i mientres, continamos con as ropas, os libros y a mosica que te cuacan. Si conoxes bel produto (espezialmén mosica y libros) que seiga en a demba nuestra, fenos-ne saper.
Mos beyemos/leyemos/sentimos.
A botiga de Fablans
abotiga@fablans.org www.abotiga.com y http://abotiga.wordpress.com
Facebook: "a botiga de Fablans" - Skype: "Ligallo de Fablans de Zaragoza"
Coso, nº112. Zaragoza - Telf. 976 231 299 y 692 637 391
No hay comentarios:
Publicar un comentario