Ligallo de Fablans de Zaragoza ha enzetau una campaña ta nimbiar mensaches eleutronicos endrezaus ta Rosa Pellicero y José Quílez, responsables d’Aragón Radio y Aragón Televisión demandando una programación en aragonés.
En o Diya Internazional de a Luenga Materna dende Fablans Zaragoza “queremos demandar á la Corporación Aragonesa de Radio y Televisión una programazión en aragonés. Queramos, que no, os meyos de comunicazión son una parti más de a tresmisión cultural. No ye que a telebisión u a radio faigan aora de pais y mais de os fillos nuestros pero ye imposible dar bando á una luenga que no se charra en os entes publicos aragoneses”.
“L’aragonés puede sentir-se en atras radios, pribadas u libres, pero no en a radio y telebisión publicas d’Aragón. A Corporación Aragonesa de Radio y Televisión, como ente publico á o serbizio de a poblazión aragonesa, debe atender as nesezidaz d’un seutor que demanda cultura propia, igual como fan atros países con as suyas luengas propias. Entendemos que as personas que quieren sentir l’aragonés en radio y telebisión no son a mayoría de os aragoneses, pero igual pasa con a resta de a programazión: no tot o mundo tiene intrés por un programa de cozina u de esportes y sin dembargo bi’n ha”, sinyalan dende Fablans.
O Ligallo de Fablans Zaragoza informa que “ufrimos dende Fablans Zaragoza a nuestra colaborazión ta desembolicar programas en aragonés. Ufierta que s’estendilla á la resta de meyos de comunicazión, que nos claman puntualmén cuan nos ne amenistan. Aragón cuenta con periodistas y teunicos que pueden desembolicar ista faina de traza profesional y de calidá”.
Fuente: http://arainfo.org
No hay comentarios:
Publicar un comentario