ESPOSIZIÓN: "1982-2012, 30 AÑADAS FENDO L'ARAGONÉS"

O benién día 24 de setiembre d'iste año, se'n feráo 30 cabo d'año d'a fundazión de l'asoziazión Ligallo de Fablans de l'Aragonés por parti d'una colla de chobens que quereba luitar por a continazión d'as manifestazions culturals aragonesas y, en particlar, por a perbibenzia d'a luenga aragonesa.

Con ixa enchaquia, dende ixe mesmo día y dica o 20 d'otubre, en Casa Morlans, Fablans zilebrará una esposizión parada á l'ocheto d'amostrar todas as fainas y autibidaz que ha feito l'asoziazión en istas trenta añadas. A esposizión se desembolicará baxo lo tetulo "1982-2012, 30 añadas fendo l'aragonés" y i cullirán muitos d'os ambitos -no ye posible amostrar-ne toz por manca d'espazio- en os que s'ha embrecau l'asoziazión en tot iste tiempo, como son a publicazión de barias rebistas en aragonés, dizionarios, libros y discos; atros más festibos como son a zilebrazión d'a Tronca de Nabidá, as ripresentazions d'a Colla de Teyatro, a zilebrazión d'os Carnabals; y tamién autibidaz didauticas como son os Cursos d'Aragonés, seminarios y charradas. Tamién cal trucar o ficazio d'a graniza colezión de Chambretas y atros articlos que han alcompañau á la Botiga de Fablans en o suyo camín.

Mientras toda l'añada que dure o cabo d'año ista asoziazión irá fendo una buena ripa d'autos rilazionaus con as autibidaz que de siempre han estau parti d'a esistenzia de Fablans y que de contino s'han feito de cara ta la soziedá aragonesa en cheneral y, d'ixa traza, ubiertos ta la partizipazión de qui, de baldes, quiera amanar-se-ne, si bien tenendo como prenzipals protagonistas á os suyos sozios y colaboradors. Istos han estau siempre o mayor tresoro de l'asoziazión y son os que han feito que, en tot iste tiempo, Fablans sía conoxiu como una entidá de calidá, seriosa y independién.

Tamién, mientras que dure a esposizión, l'asoziazión tien programadas barias charradas, feitas por sozios y ecs-sozios, en do mos charrarán de custions como lo prozeso de fundazión de l'asoziazión, os suyos primers años de bida, una esnabesada ta esfender o Pirineu, etz. Encara se'n son parando más, que se nunziarán más entadebán.

Charradas programadas:
-Día 24 de setiembre, Fernando Romanos. Prozeso y fundazión.
-Día 1 d'otubre, Chusé Aragüés. Primeras añadas de Fablans.
-Día 20 d'otubre, Ricardo Párraga. Esnabesada pirinenca ta esfender o Pirineo.

Dende iste momento, y á trabiés d'os nuestros meyos de comunicazión cutianos, s'irá autualizando toda la informazión rilazionada con o cabo d'año, a esposizión y os esferens autos que feremos con enchaquia d'iste ebento.

Os nuestros meyos de comunicación:
-Web: http://fablans.org/zaragoza/
-Blog: http://fablanszaragoza.blogspot.com.es/
-Facebook: https://www.facebook.com/fablans.zaragoza

-Twiter: https://twitter.com/ligallo

Ta enamplar informazión:

Chan Baos,
Presidén de Fablans Zaragoza,
Telf. 692637391 y presidenzia.zgz@fablans.org

Datos d'a esposizión:
-Casa Morlans, Pza San Carlos, 4
-24 setiembre – 20 otubre de 2012.
-Debantadera á las 19:00 oras, apegada de cartels dende a siede de Fablans (Coso 112, pral. cucha)
-Orarios de setiembre: de lunes á biernes de 8:00 a 21:30 oras.
-Orarios de otubre: de lunes á biernes de 8:00 a 21:30 oras, sabados de 10:00 a 14:00 y de 17:00 a 21:00 oras, domingos de 10:00 a 14:00 oras.

Antonio Brosed
Redazion d'o blog