A propuesta ye de fer una trobada de quatro u cinco días de chent que l`agane d’amillorar l'aragonés oral. Queremos chuntar-nos entre totz pa fer unas chornadas aon aprendamos os unos d'os atros a charrar un millor aragonés. A ideya ye de creyar ixos días un ambient aon l'aragonés siga a sola luenga de comunicación entre nusatros pa fer posible vivir en aragonés. Per ixo feremos a trobada en un lugar aragonesofablant.
A ormino nos trobamos con que s'ha feito muito por a recuperación d'a nuestra luenga en as zaguers quaranta anyadas, pero con tot y con ixo encara bi ha una ripa de faina por fer. Un punto fundamental que encara no hemos puesto superar y que cal fer un poder firme pa conseguirlo ye que os fablants patrimonials no charran con os neofablants. Ye verdat que ista afirmación ye simpla, y que a-saber-la chent d'os lugars charra con chent que ha aprendiu en as escuelas d'aragonés, y por ixo cal fer un poder por amanar-nos t’os lugars y fer pacha entre totz. Si en somos poquetz y amás no charramos ni entre nusatros, o futuro ye fosco. Cal conoixernos y viyer que tampoco no somos tan esferents os unas d'os atras. Unatro punto basico ye a trencadura que existe entre os espacios aragonesofablants y castellanofablants. A escuela, os medios de comunicación, l'administración publica, as ciudatz, as botigas... ye muito embolicau fer un poder pa charrar en os puestos an que no ye pas normalizau, y más que más an que ye de raso viedau. As razons en son muitas (a presión social d'un mundo castellanofablant, a vergüenya interiorizada, o sentimiento d'inferioridat linguistica...), pero lo important ye conseqüencia evident d'isto: o retacule d'a luenga ta un espacio por cada día más chicot y que a l’arreu se va perdendo de forma contina. En os lugars, a luenga dispareix en primerías d'a carrera, dimpués d'a tabierna y en zaguerías plega en casa pa morir en a cocina. En as ciudatz os neofablants aprenden aragonés y se troban con que saben una luenga que no pueden charrar: belún lo charra con a chent que ha conoxiu en os cursetz, belatro lo escribe per internet, os mosicos fan cantas y os escritors escriben en aragonés... pero no bi ha continidat, encara que por cada anyada más de 450 presonas lo estudeen, pero d’ístas, ņquántas lo emplearán en a suya vida cutiana? A realidat ye que poquetas. Cal vivir en aragonés, muita chent ya lo fa, y a atras les cuacaría pero les puet a vergüenya y a miedo... per ixo ye important entre totz fer pacha pa construir espacios aon charrar, chugar y vivir en aragonés!
Hemos decidiu de fer a Trobada d'o 18 mierques t’o domingo 22 de chunyo, porque ferá buen orache y porque coincide tamién con o Día d'a cultura chistabina que se fa en o lugar vecín de Sant Chuan. Se i amuestra en a carrera l'argüello per a luenga, a cultura y os vestuaches tradicionals. O día d’a cultura chistabina ye a Fiesta gran d’o lugar de Sant Chuan, y se fa o tercer sabado de chunyo. En a programacion bi ha un ixambre d'actividatz: chenta popular, conciertos, l'actuación d'El corro d'es bailes... ye un día perfecto pa trobar-nos y charrar aragonés!
Programa
Mierques 18:
– Dende as 12.00 dica as 17.00 plegada d'os participants, aloix, y reparto d'os materials
– 18.00 Presentacions y chuegos (per a colla organizadera)
– 20.30 Presentacion de l'Archivo audiovisual de l'aragonés (A.C. Parola)
– 22.00 Cena
Chueves 19:
– 9.30 – 11.30 Curso d'aragonés
– 11.30 - 12.00 Descanso
– 12.00 – 13.00 Curso de chistabín
– 14.00 Chenta
– 17.30 Taller de teatro participativo en Chistabín “el ferrer de Serbeto”
Viernes 20:
– 9.30 – 11.30 Curso d'aragonés
– 11.30 - 12.00 descanso
– 12.00 – 13.00 Curso de chistabín
– 14.00 Chenta
– 21.00 Cena
– 22.00 Curto en aragonés: Por qué deixamos o nuestro lugar? + Debate
Sabado 21:
– 9.00 cursa per os monts, explicación d'os animals y a flora d'a Redolada. Ibai Bona Zueco >Colla Fernando Ferrer- Nogará / Tarazona<
– 14.00 Brena d'alforcha en o mon (a colla organizadera para os entropans)
– 15.00 Café charrada “experiencias d'amostranza d'aragonés. L'amostranza en Zaragoza”. Por mayestros de Nogará y Fablans.
– Debate Vivir en aragonés ye posible? Totz de Conchunta
– 22.00 Curto en aragonés “Cosetas d'aentro” presentau por a directora Lola Gracia
– Dimpués qui quiera puede baixar-se ta la Borina que bi ha en Sant Chuan
Domingo 22 Día d'a cultura chistabina:
– 11.30 Baixada ta Sant Chuan t’o Día d’a cultura chistabina
– 12.00 Plegada en a plaza y participación en as actividatz organizadas en o lugar
* pasavilla per o lugar
* Actuación CORRO D’ES BAILES y ”Es borches de la Val”
* Muestra de vestuache tradicional chistabín
* A fayena de filar con as ”Filaderas d’a Val de Chistau”
* Trobada d’artesanos chistabins
– 14.30 Participación en a chenta popular en Sant Chuan
– 19.00 Chicota valuración d'a Trobada
– 20.00 Adiós y tornada ta casa
No hay comentarios:
Publicar un comentario