A plataforma “Esfendemos as luengas” quiere denunciar, una vegada más, a manca de sensibilidat y solidaridat con a luenga aragonesa, ista vegada por parti d’os organizadors d’a chornada d’o 22-M en a capital de l’Estau espanyol, con enchaquia d’a plegada d’as “Marchas por a dignidat”.
A representación en o cartel-pancarta, que aculliba a celebración de l’acto central d’a chornada, de nomás quatre d’as luengas minoritarias de l’Estau espanyol deixa un sentimiento en Aragón de tristeza y desentendimiento, debant d’un d’os problemas por o que más s’ha demandau “dignidat” en os zaguers tiempos en Aragón.
L’aparición cutiana d’as cooficials catalán, euskara y galego como representants d’o mundo minoritario no habría d’estar un costumbre con que aconortar a la población aragonesa más reivindicativa. A inclusión d’a chirmana luenga de barallas “asturiano”, en a mesma situación d’alegalidat que l’aragonesa, ye lo millor eixemplo a seguir. Eixemplo que, manimenos, ha feito prender a purna d’a crispación en o movimiento d’esfensa d’a luenga aragonesa. A insolidaridat con l’aragonés yera present en o cartel con títol “Dignidad (cast.), Dignidá (ast.), Dignitat (cat.), Dignidade (gal.) y Duintasuna (eusk.)” que presidiba l’acto central d’o sabado en a “Pza Colón” de Madrit.
A luita por a “dignidat” y solidaridat entre as culturas oprimidas ye una d’as prioridatz d’a nuestra plataforma. No entenderíanos una sociedat más chusta aon que a cultura y as trazas d’expresión estasen por demás. A luenga aragonesa no habría d’estar nunca más amagada en un Estau espanyol con “dignidat”.
Fuente: http://esfendemosasluengas.wordpress.com
No hay comentarios:
Publicar un comentario