CHARRAMOS CON ELENA GUSANO, DIREUTORA DE DINGOLONDANGO TEATRO

O prosimo díya 26 d'iste mes, o grupo de tiatro Dingolondando ba a presentar en Zaragoza a suya zaguera obra “Isto s’afunde”, obra enguerada o pasau mes d'agosto en o puesto d'orichen d'o grupo, Ansó. Con ista enchaquia charramos con Elena Gusano, escritora, direutora, y interprete chunto a atros dezisiete autors, d'ista comedia tiatral. Elena, escritora en aragonés ansotano, ye autora d'o libro “Guisos y ditos en os fogarils d’antismás” (2004), d'o relato ”Maiberal“ (2008), ganador en o Concurso de Relatos Cortos en Aragonés “Luis del Val”, y d'as obras de tiatro: “Yesica, un abrío d’agora”, que s'engueró en 2008; “Percaciando una facería” enguerada en 2010 y con a cuala obtenió o premio a la millor direzión en a I Muestra de Teatro Amateur Villa de Biescas; y d'a rezientemén enguerada “Isto s’afunde”.

Fuente: http://xordica.com
Con iste curriculum no ye estranio que se la tienga como un referén d'o tiatro en aragonés y que, mesmo, Mª Pilar Benitez faiga una menzión espezial de busté, y d'o grupo de tiatro que diriche, en o rezientemén publicau “El aragonés, una lengua románica” (2012). Tos pensabaz que plegaríaz a tener tanta repercusión?

Nusotros femos o que nos fa goyo y lo femos con toa a rasmia que tenemos pero somos una cuadrilla de comedians aficionaus y a repercusión que hemos teniu nos parixe un melagro.

Conta-nos un poquet cómo, án y cuán surte la ideya de formar a colla de tiatro Dingolondango.

Si fa 10 añadas plegan a decí-me que bi’staría en Ansó un grupo de teatro y amas que faría as comedias en ansotano, hubiera i dito que estaban loliando. Muitas vegadas a vida t’ubre puertas que no pensabas que estieran y, asina, o que naxó sendo un sketch chicorron pa celebrá o remate d’o curso d’aragonés pa mayorencos que estábamos fendo, medro y pintó y, sin chuco ni muco, nos trobemos que yeramos una cuadrilla de teatro y, pa forro bota, nos ufrieron fe a comedia entro d’o programa d’o PIR 2008 y…agún no tenebamos nombre, teniemos que agenciá-nos uno a escape pacalá-lo en os papels. Asina naxó Dingolondango Teatro. 

Tenendo en cuenta que son cuasi una bentena de presonas as que fan isto de traza afizionada y no todas biben en a redolada, be d’estar muito difízil aconseguir chuntar-tos toz ta ensayar?

No ye fácil pero bi’stá que trobá o forau. En o ivierno se reparten os papels, toz chuntos leyemos a comedia y charramos d’o testo, d’as palabras… os comedians pa podé sentí o papel tien que comprendé-lo, felo suyo y, dimpués, comencipiamos á estudiá y ensayá. En o verano ye cuando podemos chuntanos toz en Ansó, por ixo as comedias las femos por primé vegada en os zagués días d’agosto. 

Ista autibidá, a d'o tiatro, ha contribuyiu a la dinamizazión d'a cultura ansotana, chunto a atras como son o día d’ecsaltazión d'o trache ansotano, o PIR, etz., en iste caso a trabiés de l'uso de l'aragonés ansotano. Se tien conzenzia d'ixo dende o grupo de tiatro?

Anque no charramos muito d’ixo, me pienso que si. Solo fa falta vié como se plena o cine d’Ansó os días que femos comedia, y que, cuando marchamos ta Barcelona u Zaragoza, os ansotanos claman ta os pariens y os conoxius pa que acudan a vié-nos, alora paras cuenta de qu’han feito suyo a Dingolondango Teatro, que están rufos de nusotros. 

L'uso de l’ansotano en as buestras representazions tiatrals cómo ye rezibiu en puestos an que a luenga aragonesa ya no ye tan biba u, mesmo, desaparexida como ye o caso de Zaragoza?

L’ansotano, moniqué a moniqué, s’eslenata o fumaral ¿Cómo está agora?. No puedo decíles trapacerías. Está meyo muerto pero agún… no está muerto. ¿Cuánto durará? Ixa ye a pregunta. Nusotros no queremos sé os matadós, por ixo femos teatro en aragonés-ansotano. 

Charrando ya d'as obras que tenez engueradas. En “Yesica, un abrío d’agora” nos charrabaz d'o cambeo climatico, d'a globalizazión, d’o zaguer onso. En “Percaciando una facería” d'as dibertidas luitas entre ombres y mullers. Qué nos imos a trobar en “Isto s’afunde”?.

De primeras nusotros siempre charramos d’a vida d’agora. En “Isto s’afunde” se conta que isto s’afunde, ¿qué ye o que s’afunde?... Lis pido meco por no contestá a ixa pregunta, tien que fese cargo que o misterio chuga a nueso favó. 

He leyito en bel puesto que tenez una puncha clabada porque encara no ez puesto representar garra d'as buestras obras en Chaca, a capetal d'a comarca. Tenez prebisto aconseguir-lo con ista terzera obra?

No ye una puncha, ye una fusta d’abete que tenemos fincada. Toz as mandamases de Cultura d’a Comarca d’a Chacetania, os d’antis y os d’agora, nos han dito que quieren levá-nos pero…más tadebán, asina dende 2008. O dito castellano de “a la tercera va la vencida”, ista añada podremos vié si ye verdá.

Bella coseta más que quieras contar-nos ta animar a la chen a que baiga a beyer-tos iste sabado?

O teatro naxó cuando una persona contó una historia y os que la escuitaban la ficieron suya. Nusotros femos teatro, aficionau, pero teatro y aguardamos que os espetadós viengan a viénos porque sin ellos no n’istá representación, ellos zarran o corroncho…

Antonio Brosed,
Redazión d'o blog

No hay comentarios:

Publicar un comentario