A REBUTIR DE CHENT EN A PRESENTACIÓN DE “PROU, PROU LUEN”

Os autors Tamara Marzo y Carlos García y Gonzalo González (d’ARA Cultural) presentoron en Zaragoza o suyo libro “Prou, prou luen”, un libro disco de falorietas meyoambientals ta ninos y grans. O libro, en que ha colaborau o departament de Meyo Ambient d’o Gubierno d’Aragón, presenta amás unas ilustracions feitas por Chusé Bolea.

A presentación, en La Pantera Rossa, estió a rebutir de chent, que quereba dar o refirme a os autors y mercar un libro que aduya a os chicotz a entender o meyo ambient de paisaches amanaus como L’Alfranca, a Sarra d’Albarracín, Guara u Ordesa, a traviés d’as historietas que protagonizan una fuella, una alica, un escarabaixo y una babieca, alcompanyaus d’atros muitos animals que esplanican as suyas esferencias y similitutz.

En o libro disco as voces han estau ripresentadas por Eduardo Lolumo, Antón Castro, Jorge Asín u Fran Fraguas, que s’han prestau desinteresadament a colaborar con as suyas voces. Un sobreintresant libro t’amostrar os valors d’o meyo ambient y d’a luenga, como se’n dició en a presentación y que amanan un mundo animal tant quiesto y amanau como desconoixiu.

En l’acto tamién partecipo a Chaminera d’Angel Vergara y Toche Menal, inte que reculle o video, que con as suyas cantas y chuegos amanó os paisaches d’as falorias ta os presentz, amás de reivindicar a mosica tradicional y os suyos trastes ta fer veyible un mundo más en concierto con a naturaleza.

Fuente: www.arredol.com

1 comentario: