RUDI NOS TORNA T'A REYALIDAT

Ya lo venibanos mascando dende as eleccions d'o 22 de mayo, pero agora ya ye anunciau y me pienso que, en tornar d'o verano, será un feito. A lei de luengas ye muerta. U se derogará u se cambiará ta que no faiga honra. Mesmo menos que no'n fa agora.

Analisi politico cuento que no cal. O espanyolamen chungo ha pactau con a interpresa de servicios politicos y como no quieren nian charrar de qualcosa que no sía l'espanyol y o fragatí, nos deixan más difuera d'a reyalidat. No nos reconoixen como personas con os mesmos dreitos que a resta d'habitadors d'o país. Si con ista lei de luengas no los tenebanos guaranciaus de tot, agora tornamos a estar “outlaws”.

¿Y qué feremos agora en Fablilandia? Bi ha habiu esferents camins dende que se dició que se fería una lei de luengas y que d'astí en surtiría una academia. Un que esfendeba que caleba continar treballando independientement de lo que fese a D.Ch.A pos no caleba asperar-ne cosa y ixe treballo nunca no sería por demás. Ye la que he esfendiu yo y me pienso que lo tiempo y os feitos me dan a razón. Atra que deciba de asperar a que a D.Ch.A. fese y desembolicase a lei y que toda a resta de cosas no valeban. Agora que ixo no pasará, a lo menos en quatre anyadas no sé o qué ferán.

Ya no tenemos a lo gubierno treballando por nusatras. Agora tot pende de nusatras mesmas. Tot lo que se faiga por l'aragonés pendera de lo que queramos y podamos fer as personas que charramos y esfendemos ista luenga.

¿Y d'a normativización qué? L'academia triada fa pocos meses nunca no será nombrada por o gubierno y, prou que nunca no podrá fer un standard oficial (con o sentiu de institucional). Asinas que tornamos a la situación d'antis. Continamos sin tener una autoridat reconoixida por todas as asociacions y fablants. Contino pensando que l'Academia de l'aragonés (EFA) tien prou representatividat, autoridat por a traza de naixer y refirme social como ta fer ixe rol d'autoridat. En tot caso ye una autoridat que no puet exercer o CFA, Nogara, Fablans u qualsiquier atra asociación. Asinas que, qui asperaba a lo gubierno, ¿qué ferá?. ¿Qué feremos totz? ¿Fer un atro congreso ta que, sino sale lo que me mola y soi o president boicotear-lo? ¿Charrar o mio modelo d'aragonés con os mios amigos y dedicar toda a rasmia mía a criticar a l'atro?

Quatre y concaradas, iste ye o nuestro país y ista ye a nuestra luenga. Torno a decir lo que siempre he dito y sisquiá m'entiboque. A l'aragonés no lo salvará garra gubierno (mientres continemos estando una autonomía espanyola, ye de dar), u a lo menos, no cal asperar que lo faiga. A l'aragonés lo salvaremos u lo feremos morir qui lo charramos.

Fuente: http://barrenau.blogspot.com

1 comentario:

  1. Soi sozio de Fablans-Zaragoza. Ya lo dezidiemos en Asambleya: femos serbir a ortografía de lo 87 como ofizial encara que rispetamos as demás y no la imponemos a os nuestros sozios.
    Ta 1987 no teniemos o consenso que querébanos, pero en tenébanos más que agora, asinas que yo, presonalmén, i torno encara que "probisionalmén" y pensando que, en reyalidá, lo más razonable sería fer serbir una ortografía alazetada en a castellano-española (a que feban serbir Veremundo u Torrodellas), siauncaso con bella adizión de as atras propuestas ...
    Yo creigo que l'aragonés no se salba sin patriotismo, amenistamos patriotismo y dialogo, y dixar d'endizcar-mos os uns contra es atros. Pero bueno, un leye bels blocs de a "Cucha Independentista" y para cuenta de que bi ha chen que ya ha dezidiu fer ixo que diz barrenau: charrar o suyo modelo y "enrestir" contra l'atro. Pos mozez, creigo que o tiempo d'enrestir uns contra atros ye menister dixar-lo pasar.

    ResponderEliminar