Presentada a grafía que tractará d’unificar l’aragonés

A zaragozana Biblioteca d'Aragón acullió ahiere a las siet horadas d'a tarde l'acto de presentación d'a nueva grafía que tractará d'unificar l'aragonés y as suyas variedatz

L’encargau d’ubrir l’acto estió o director cheneral de Politica Lingüistica d’o Gubierno d’Aragón, José Ignacio López Susin. Dica o momento han coexistiu tres grafías diferents d’a mesma luenga, o qual ha dificultau l’amostranza y expansión de l’idioma.

A iniciativa d’o Gubierno d’Aragón, iste se metió en contacto con as asociacions que heban publicau as grafías de l’aragonés mas extendidas dica agora. Istas yeran o Consello d’a Fabla Aragonesa, a Sociedat de Lingüistica Aragonesa y o Estudeo de Filolochía Aragonesa. O metodo que se decidió estió que cadaguna d’istas sociedatz esleise un expierto en qüestions lingüisticas y entre os tres estudiasen os sistemas ya existents y creyasen una nueva ortografía de consenso.

Os trigaus estioron Michael Metzeltin, d’a Universidat de Viena; Patric Sauzet, d’a Universidat de Toulouse y Ramón d’Andrés Díaz, d’a Universidat d’Oviedo; os tres yeran expiertos en filolochía d’as luengas romances. D’Andrés estió l’encargau de representar a o trío d’expiertos y explicar a suya propuesta en l’acto de presentación en a Biblioteca d’Aragón.

D’Andrés prencipió a suya exposición expresando que heba estau, ta ell y os suyos colegas, una honor haber estau trigaus ta iste quefer. O profesor continó explicando que a importancia d’a suya labor se deriva d’a critica situación en que se troba a luenga aragonesa y que ista, ta salir d’a suya situación, ameneste d’unas normas comuns y claras que faciliten a suya amostranza y transmisión.

Os criterios que se siguioron ta creyar a suya ortografía estioron, seguntes d’Andrés, trobar un equilibrio entre a “racionalidat lingüistica y as tradicions socioculturals” ta aconseguir o consenso de totz. Tamién, como filologos, d’Andrés afirmó apreciar a luenga aragonesa y o esfuerzo d’a suya comunidat de charrantes ta dignificar-la y dar-le un futuro viable y que “brenca nos satisfería mas que contribuir positivament a ixa gran interpresa colectiva”.

Una vez presentada a nueva grafía y as suyas prencipals caracteristicas a las diversas asociacions que estioron presents en l’acto s’ubrió un plazo ta que istas la estudeen. Disposen dica o proximo 13 de marzo ta proposar as suyas sucherencias, modificacions u queixas sobre ella.

Fuente: arainfo.org