O PP clama “Ayatolás” a ZeC y CHA por presentar una moción de reconoiximiento de l’aragonés.

A moción heba estau presentada por “Zaragoza en Común” y bi heban interveniu, Fernando Rivarés, como concellero de cultura de Zaragoza en Común, en un discurso en aragonés y castellano. A moción instaba a o Gubierno d’Aragón, a l’igual que se ye fendo en muitos atros lugars d’Aragón, a declarar a ciudat como zona d’emplego historica d’ista luenga.

A intervención de Rivarés se centró en remarcar a presencia historica de l’aragonés en Zaragoza, do seguntes o censo de 2011 viven más de 7.000 parladors, 1/3 d’os totals; y remarcó a demanda d’a UNESCO de protección como luenga en peligro.

Lo solo refirme que replegó a propuesta de Zaragoza en Común estió la de CHA. Carmelo Asensio, como vocero de CHA, remarcó l’emplego d’a luenga aragonesa como luenga de cancillería, de dreito y de traducción d’obras clasicas dende o griego, en a Corona de Aragón. Tamién Jorge Pueyo, como militant de Chobentú, en o papel de parlador patrimonial de Fonz y ciudadano de Zaragoza en l’actualidat.

Por cuentra, o PP (Partiu Popular), con un discurso de Ángel Lorén pleno de incorreccions y cerina, sinyaló que l’aragonés tiene más de 20 variedatz, y culpó a Jorge Pueyo por no saber en qual d’istas variedatz charraba, a tamás de l’emplego d’a variedat de Fonz por Jorge. Plegando a afirmar que a intercompresión entre variedatz de l’aragonés ye imposible, quan en realidat ye a vida cutiana de muitas personas en Sobrarbe, Ribagorza u Chacetania.

Pa rematar Ángel ha insistiu en esfender una ciudat de “mas Obama y menos Ayatolás“, clamando “Ayatolá”, con no se sabe que connotacions, a todas as personas que charramos y esfendemos l’aragonés. O PP declaró que quiere un ciudat con l’anglés como “luenga vehicular” y no pas l’aragonés.

Cristina García (C’s) a tamás d’o rispeto a l’aragonés y as suyas modalidatz, refusó a iniciativa por tractar-se o castellano a unica luenga mayoritaria en Zaragoza. Tornando a sinyalar razons economicas que no puede permitir-se o Concello de Zaragoza, pero que manimenos si los gasta en patrocinios a Instituto Cervantes y RAE, u exposicions y congresos d’o “Espanyol” en UZ.

O PSOE con Lola Ranera, en un acto de cinismo, consideró a propuesta de “desproporcionada” por querer considerar a luenga aragonesa d’emplego historico en Zaragoza y se abstenió por considerar a propuesta d’ambito autonomico y no pas municipal. Manimenos lo suyo grupo ha refirmau propuestas similars en Galicia, Asturias, Comunidat Valenciana,… y ya en bells lugars d’Aragón.

Fuente: arainfo.es

1 comentario:

  1. A cultura ya no ye una custión sozial sino politica. Si son os politicos os que han de dar-nos os dreitos, bamos daus.

    ResponderEliminar