O pasau viernes 10 de febrero, Chusé Raúl Usón, editor de Xordica, nos presentó "Lo infinito en un chunco", de Irene Vallejo, en a suya traduzión a l'aragonés y edizión en Xordica. Tamién fabló y disertó, debán de as 18 personas que empliban a siede de Fablans y d'a Fundazión Aragonum, sobre o prozeso de normativizazión -creyazión d'un modelo lingüistico- y normalizazión -emplego sozial- d'a luenga aragonesa. Entre toz i-pasemos una tarde pistonuda, que caldrá repetir-ne.
Viernes 10 febrero. 19 oras
Presentazión de "Lo infinito en un chunco. La invención d'es libros en o mundo antigo"
O libro d'Irene Vallejo será presentau por o suyo editor, Chusé Raúl Usón, Ediziones Xordica, en a Siede Sozial de Fablans.
Si quiers venir-ie, cal avisar-ne a Secretaría (tfn. 692637391), por whatsapp, u por e-mail, escribindo a presidenzia@fablans.org
Ta cualsequier partizipazión en as autividaz, cal avisar-ne a secretaría; Tfn 692637391, por whatsapp, u por e-mail escribindo a presidenzia@fablans.org
• 10 de Febrero, 19 oras. Presentazión de “Lo Infinito en un Chunco”, Autor: Chusé Raúl Usón. Editato por Ediziones Xordica. Puesto: Siede Sozial Fablans.
• 17 de Febrero, 19 oras. Presentazión de “Espeutral Comic” cómic en Aragonés. Autors: Angel Guinda e Josema Carrasco. Editato por Olifante Ediziones de Poesía. Puesto: Siede Sozial Fablans. Se ferá o 22 d'abril, con os Omenaches arredol de l'aragonés. Tos informaremos.
• 05 de Marzo. Partizipazión en l´autividat d´a Cincomarzada. I seremos dende o maitin dica ra tarde (iremos concretando orarios). Mesa informativa e botiga.
• 10 de Marzo, 19 oras. Charrada sobre Responsabilidat sozial corporativa, con Ebardo Herrero.
• 17 de Marzo, 19 horas. Charrada de: “O prozeso de recuperazión d´a luenga aragonesa”. Por Carlos Miguel Abril Carceller.
• 16 d´Abril. Vesita guiata t´o zentro d´interpretazión de l´aragonés. Puesto: Monesterio de Casbas.
• 22 d´Abril. Omenaches arredol de l´aragonés. Zena e omenaches a sozios istoricos d´o ligallo e a suya labor en defensa d´a lengua aragonesa. Reconoiximiento a os voluntarios. Presentazión d´a Colla Chovenil de Fablans.
• 23 d´Abril, día d´o libro. Partizipazión con una mesa ta ra venta de libros. A botiga será Ubierta ixe día.
Viernes 20 chinero: Trunfas a ra importanzia
A escritora y dramaturga Elena Gusano Galindo replegó o pasau 12 chinero o Premio Chuana Coscujuela 2022, en o Palazio de Congresos de Chaca.
L’auto, que estió amenizau por o grupo mosical Gaiters de Chaca y o grupo de teatro Dingolondango, estió conduziu por Mamen Sánchez y contó con a presenzia de l’alcalde de Chaca, Juan Manuel Ramón; d’a presidenta d’a Comarca d’a Chazetania y alcaldesa d’Ansó, Montse Castán y d’o direutor cheneral de Politica Lingüistica, José Ignacio López Susín.
O Premio Chuana Coscujuela, empentau por a Direzión Cheneral de Politica Lingüistica d’o Gubierno d’Aragón, tiene carauter onorifico y reconoxe una labor continada u d’espezial notoriedat y importanzia, en cualsequiera d’os ambitos sozials, culturals, esportivos, artisticos, economicos, etz., que supongan un destacau benefizio ta la luenga aragonesa.
En a presén edizión, o churau dezidió atorgar o gualardón a Elena Gusano Galindo por o suyo treballo por revitalizar l’aragonés ansotano, por a suya capazidat de treballo y a suya implicazión en a dinnificazión d’a luenga aragonesa.
A escape has de crompar-ne “La estación de las violetas”, o zaguero treballo d’A Ronda de Boltaña, un disco sobrebueno que podrás pillar-te en a botiga d’o Ligallo de Fablans, a ro millor pre de totas as botigas dimpuesas que t’en faigas una golladeta: solo que 15 €. En iste disco, amás, colaboran con A Ronda un buen camatón de mullers, a-saber-lo grans artistas: Rozalen, María José Hernández, Carmen París, Ester Vallejo, Ana Diáfana, Emma Sánchez y Amaral, que interpreta “Canta d’a luenga matria” en aragonés.
Alcuerda-te que son os zagueros días d'a tronca de Nadal en o Centro Independencia de Zaragoza (dica ro 5 de chinero, de 17:00 a 20:30). Y una foto de baldes a toz que se i amanen. Leva-te-ne una. Ye una esperienzia ta espleitar en familia.
21 d'aviento. O primer día d'a tronca de Nadal han pasau 54 ninos y ninas
O pasau 17 d'aviento zelebramos a zena de Nadal d'o Ligallo de Fablans de l’Aragonés, en a que bi estiemos 35 ligaller@s que lo pasamos a-saber-lo bien. A borina estió a o canto la siede, en El Caracol de Independencia, y zarremos os corredors ta nusatros, dende as nueu dica más d'as doze d'a nuei. A zena estió de conchunta y a ixena (cada casa teneba que trayer-ie a minchanga u birolla ta compartir-ne). Felizitazions a toz y a totas perque ya ye Nadal y o 21 d’aviento empezipia a Tronca. Como l’año pasau, la feremos de tardes en El Caracol.
O Ligallo de Fablans de l´Aragonés no podeba desaproveitar ista oportunidat que se terzia anualmén en Monzón e i paró un stand a ro largo d´os tres diyas de durada que en tenió ra FLA, un stand an poder amostrar-ie e vender-ie os nuestros productos (libros, discos e chambretas). Antiparte, rezién publicata y ya en a carrera, yera ro momento de presentar-ie ro zaguer numero d´a nuestra revista “Orache” en soziedat, con o suyo escarraclant nuevo formato e ros suyos nuevos contenitos, esbrinando de buen implaz , punt por agulla toz os detalles, por o presidén d´o Ligallo de Fablans de l´Aragonés-Fundazión Aragonum, Guillén Forcada, en a presentazión d´o miercols 7 d´aviento.
Toz e totas que s´amanoron a ra presentazión de “Orache” u per o nuestro stand, podioron conoixer-ie de primera man a revista, adquirir-la e suscribir-se-ie. Dende Ligallo, queremos felizitar a ra organizazión d´a FLA porque, dimpués d´istos años en os que a COVID-19 ha perchudicato seriosamén as nuestras vidas, o zertamen montisonense ha recuperato ras zifras de visitans e ventas anteriors a ra pasa. Ye un esito de raso e una satisfazión que prauticamén a totalidat d´as editorials aragonesas e mas de 100 escritors s´aigan enzertato istos díyas en a capital d´o Zinca Meyo.
Aproveitando ros zaguers díyas d´a esposizión “ Vozes en o zierzo/Veus en el cerç/Voces en el cierzo, escritoras en aragonés e catalán d´Aragón, ubicata en o Paraninfo de Zaragoza, o pasato 29 de noviembre teniemos o verdader e granizo plazer de reyalizar una visita guiata por una d´as comisarias d´a muestra, Chulia Ara.
Dende ros primers escritos en aragonés de Ana Abarca de Bolea u Isabel de Rodas, ambas en o sieglo XVII, dica ra primer escritora contemporania en aragonés chistabino, Nieus Luzía Dueso Lascorz. Sin ixuplidar a Victoria Nicolás, Rosario Ustáriz, Nati Castán u Chuana Coscujuela, ista zaguera, autora d´uno d´os libros más leyitos en a nuestra luenga: ”A Lueca”. Y en zaguerías, as escritoras autualmén en autivo como Maria José Subirá u Carmen Castán, ambas en patués, Ana Cristina Vicén, Ana Tena, Carmina Paraiso -una d´as primers mayestras que amostró l’aragonés dintro d’o sistema d’amostranza d’a Comunidat Autonoma d’Aragón-, Elisa Garzía -autora de “La bal de la vida” publicata por Ligallo de Fablans en 1998-, Kalu Treviño, Ana Giménez, Elena Chazal, Elena Gusano o Mª Pilar Benítez, nomás por nombrar a ras escritoras en aragonés.O panorama se completa con as escritoras en catalán de Aragón.
“Vozes en o zierzo”, ye organizata por a Direzión Cheneral de Politica Lingüística d´o Gubierno d´Aragón e por o Vizerreutorato de Cultura e Proyeuzión Sozial d´a Universidat de Zaragoza. Si encara no has visto ra esposizión, podrás veyer-la en o Palazio de Congresos de Chaca (dende ro 16 d´aviento de 2022 t´o 15 de chinero de 2023) e posteriormén, en a Sala Monezipal d´Esposizions de Alcañiz (dende ro 27 de chinero t´o 12 de marzo de 2023)
