Ahiere de tardes, en o Salón Antigo de Plenos d’a Diputación Provincial de Zaragoza (DPZ), i teniemos una estupenda sesión de "Trobadas con…”, programa de presentacions que naixe d’a colaboración entre Ligallo de Fablans de l'Aragonés, Fundación Aragonum y Gara d'Edizions. Istas actividaz fan posible encertar-se a os alumnos de Fablans y o publico en cheneral con escritors, traductors y estudiosos d’a luenga aragonesa. En ista ocasión i estiemos con Elena Chazal (Estadilla, 1960), autora de “Cuentos de la lluna nueva” y Juan Carlos Marco Pueo (Fonz, 1969), autor de “Sobre tot no tomar mal”, dos sobrebuens libros escritos en aragonés, concretament en a variedat d’a Ribagorza, que actualment puet estar que siga la variedat de l’aragonés més viva. Os mayestros de ceremonias estioron José Manuel Latorre, deputau d’Archivos y Bibliotecas d’a DPZ -muitas gracias per o suyo ofreiximiento pa fer l'acto en o magnifico Salón Antigo de Plenos-; Lizer Fleta, president d’o Ligallo de Fablans de l’Aragonés; y Chusé Aragüés, editor de Gara d’Edizions. Abant y dica l’atra vegada.
