LIGALLO EXIGE LA CREACION DEL CONSEJO DE LENGUAS

Debán d'o incumplimién de plazos ta la esleuzión d'o Consello Superior d'as Luengas d'Aragón, a Federazión de Ligallos de Fablans de l'Aragonés esbiella o suyo compromís con a Luenga Aragonesa.

Fa ya diyas que aberba d'aber-se eslechíu o Consello Superior d'as Luengas d'Aragón, organo consultibo d'o Gubierno d'Aragón alazetal ta o desembolique d'a normalizazión lingüistica de l'aragonés. No bi ha notizias sobre ista custión, nomás sabemos que s'han incumplíu os plazos ta o suyo nombramién.

A la Federazión de Ligallos de Fablans de l'Aragonés le fa duelo iste feito, pero ye conszién que, con a coyuntura politica actual, ye difizil que o Gubierno d'Aragón cumpla o suyo compromís de nombrar o ya dito Consello Superior y a subsiguién Academia d'a Luenga Aragonesa antis d'a fin d'a lechislatura.

En as zaguers 27 añadas dengún Gubierno d'Aragón no ha cumplíu l'Estatuto d'Autonomía, y o suyo compromís de esfender a Luenga Aragonesa, y no tenemos asperanzas en que isto o baiga a fer agora.

Manimenos, independientemén d'a conclusión de tot o prozeso de cumplimién, o incumplimién, d'a Lei de Luengas d'Aragón, a Federazión de Ligallos de Fablans de l'Aragonés esbiella o suyo compromís con a esfensa, cultibo y desembolique d'a Luenga Aragonesa, y mantiene a suya ofridura de colaborazión con todas as instituzions publicas o entidaz pribadas que o amenisten. Ta ixo femos una gritada a toz os fablans d'aragonés ta que esfiendan os suyos dreitos indibiduals fendose sozios de cualsiquiera d'os nuestros Ligallos de Fablans.

No hay comentarios:

Publicar un comentario