Videos de Xara Anquela #ligallofablans
EL MUSEU ETNOLOCHICO DE SAN CHUAN DE PLAN FA 40 AÑOS
En fa ya 40 años de que se va inaugurar el Museu Etnolochico grazias al treballo y la rasmia de las mullers del Corro d'es Bailes de San Chuan. Cal que estes actos sirvan ta agradeixer el tiempo que han adedicau y tot el que han tramenau. ¡Qué es disfrutez firme!
"A VAL D'AS BROXAS". JOSÉ IGNACIO LÓPEZ SUSÍN
Edición bilingüe castellano-aragonés. Una historia de broxas en a Val de Tena. José Ignacio López Susín, en Doce Robles (2023)
FABLANS TORNA TA RA FERIA D'O LIBRO DE ZARAGOZA 2023
Ligallo de Fablans de l’Aragonés ha tornau, dimpués d’años d'ausencia, a la Feria d'o Libro de Zaragoza, ya sabes d'o 3 a l'11 de chunio en o Parque Gran José Antonio Labordeta. E iste año, l'emos feito d'a mano d'Edicions Olifante. Chunto a los suyos libros de poesía, podrás trobar-ie bels clasicos d'o Ligallo, pero tamién d'o Consello d’a Fabla Aragonesa, chunto a títols más reziens u cómics. Y a l'año que viene… seremos en a Feria, pero con caseta propia.
"PEIRONELA. A CONTINIDAT DE O REINO" A LA VENDA EN FABLANS
En o Ligallo de Fablans ya i tenemos “Peironela. A continidat de o reino”, edición en aragonés de Caballeros de Exea, escrita por Sergio Miguel Longás e o debuixant Carlos Pérez “XCAR Malavida”. Ye a historia d’una monarca trascendental en o viello Reino d’Aragón. Os suyos autors han contau con l'asesoramiento de Agustín Ubieto y Esteban Sarasa, profesors emeritos d’a Universitat de Zaragoza. 25 euros. Viene-te-ne por a tuya Peironela.
FIN D'OS CURSOS D'ARAGONÉS 2022-2023 EN LIGALLO DE FABLANS
Ya somos rematando os examens y de hue en ueito se rematan os cursos d'aragonés 2022-2023 d'o Ligallo de Fablans. Cal estar atento a l'inicio d'os nuevos cursos en octubre. Gracias a totas e toz.
XXXVII BAIXADA D'AS NABATAS. RÍO ZINCA. MAYO 2023
Os nuestros amigos de l'Asociación de Nabateros de Sobrarbe han preparau a XXXVII Baixada d'as nabatas (19, 20 e 21 de mayo). Mayo, mayo..., ixo mesmo, que cal que baixe mayenco por a Zinca. Asinas que cal que pleva u caiga buen nevazo.
Posición de Ligallo de Fablans de l’Aragonés sobre a nueva norma grafica d’a luenga aragonesa (acuerdo normativo 2/2023 de 3 d’abril), transmitito a ra dirección de Politica Lingüstica o 27 d’abril n´as chornadas de consulta con asociacions que organizó a DGA.
En primeras agradeixer a ra Dirección Cheneral de Politica Lingüística, e concretament a o suyo Director Cheneral, Don Ignacio López Susín, por a important esfugada realizata a ro largo d‘istos años en os que ye estato a o frent d‘ista institución, por a fayena feita en a promoción, empente, reconoiximiento e dignificación d’a luenga aragonesa en o contexto actual d’a sociedat aragonesa. Igualment valuramos muito positivament o proceso de consulta acometito dende ra Dirección Cheneral, ta valurar l’aprebación d’as nuevas normas graficas de l’aragonés.
Ligallo de Fablans de l’Aragonés acatará aplicando ra nueva normativa grafica d’a luenga aragonesa aprebata por l‘Academia d’as Luenga d’Aragón en a suya resolución (Acuerdo normativo 2/2023, de 3 d’Abril), de forma progresiva a partir d’o venién 10 de Mayo, inte que dentrará en vigor, dezaga d’a suya publicación en o Boletin Oficial d ́Aragón (BOA). Instamos a ras institucions aragonesas involucratas: Academia y Gubierno d ́Aragón, a cooperar ta facilitar o proceso, e que iste feito historico suceda antis con antis. D’atra man nos femos firme cargo d’a important esfugada e treballo realizato en l’Academia con l’aprebación d’ista grafía, asinas como d’os votos partilculars. En tot caso, Ligallo de Fablans de l ́Aragonés a tot trance acatará aplicando a norma legal de rango superior que sía vichén en cada inte.
Finalment consideramos, que ye menister avanzar t‘aconseguir recuperar o conseso dentro d’o movimiento en esfensa e recuperación d’a luenga aragonesa. Instamos a tota ra comunidat de fablans, asociacions, entidaz e institucions responsables, ta o dialogo y entendimiento ta lograr iste obchetivo, e treballar toz e totas a-ixena por l’aragonés.
Guillén Forcada. Presidén de Ligallo de Fablans de l’Aragonés
EDITAU POR FABLANS, YA YE AQUÍ "PLANTANDO FUERTE”, O NUEVO DISCO DE OS CHOTOS
Ya
ye aquí “Plantando fuerte”, o nuevo disco de Os
Chotos, o grupo de Kike Ubieto, Daniel Farran, Dani Caracola,
Diego Zaldívar, Miguelé Abadías y Santi Manresa. Ha estau editau
por Ligallo de Fablans de l’Aragonés y por a Fundazión Aragonum.
O suyo pre ye de 15 euros, de
gufaña
si yes sozio d'o Ligallo -pasa-te a buscar-lo por a sede
en O Caracol de Independenzia-.
O pasau 22 d'abril se sintió
en Tarataña, o programa de Radio
3 que conduz Fernando Iñiguez sobre as mosicas ibericas de radiz:
podez
buscar o podcast en internet
INFORME CHURIDICO SOBRE A NUEVA GRAFÍA DE L' ARAGONÉS. FUNDAZIÓN ARAGONUM E LIGALLO DE FABLANS DE L' ARAGONÉS
A Fundazión Aragonum ha demandato un informe churidico sobre ras custions legals que pertocan a ra publicazión d’a nueva grafía de l’aragonés. A semana siguién se reunirá ra Chunta Direutiva de Ligallo de Fablans de l’Aragonés ta posizionar-se e fer dezisión sobre ra nueva grafía, caldrá parar cuenta d’o informe churidico que aquí publicamos.
Suscribirse a:
Entradas (Atom)