Xordica acaba de publicar un libro en aragonés que ye una choyeta, una troballa. Ye Historietas d'un lugar d'as Cinco Villas, de José Arbués Possat. La presentamos o viernes 30 de chinero en o Centro Aragonés de Barcelona. Ye una obra, sincerament, que habría d'estar de lectura obligatoria entre toz aquels que aman l'aragonés, pero tamién ye muito recomendable como lectura (quasi obligatoria) pa os alumnos d'aragonés de primer nivel.
Historietas d'un lugar d'as Cinco Villas ye o emotivo y bonico retrato costumbrista d'un lugar y d'una comarca aragoneses. Gracias a José Arbués –de Casa Possat de Funcalderas–, que dende nino ha feito orella a ixas historias que se contaban alredor d'o fogaril, a o tresaire d'os carasols, u que él mesmo vivió, asistimos a una gran polifonía de voces que nos conduce, como si fuera una maquina d'o tiempo, por un viache de ciento cincuanta años. Y ye asinas como historias reals d'os tiempos d'os carlistas, d'a guerra d'Africa u d'a Guerra Cevil se combinan con muestras de literatura oral (recontamientos, charrazos, cancionicas…) que nos revelan a idiosincrasia d'una chen apegada a la tierra, aspra y dura, que viyó cómo o mundo tradicional se'n iba sin que nenguno parara cuenta.
Narracions evocaderas, veridicas, chuzonas y francas, escritas de manera modelica en l'aragonés propio d'esta comarca zaragozana, que convierten a obra en o primer testimonio literario d'esta extrema variedat meridional d'a nuestra lengua.
Dende Xordica femos una campanya de promoción d'este libro entre toz os cursos d'aragonés que se fan este anyo perque creyemos que ye idonio como libro de clase, per l'aragonés que emplega (de Funcalderas, Zaragoza) como dende o punto de vista literario. Ye de buen leyer y aponderable dende toz os puntos de vista.
Adchuntamos vinclo con més información: http://xordica.com/titulos_det.php?id=229
Fuente: http://xordica.com/
No hay comentarios:
Publicar un comentario