Iste mes d'otubre prenzipiará en Buera (Uesca) un nueu
curset de luenga aragonesa en luenga aragonesa. A paranza se fa per parti d'a
colla cultural Purnas Semontano, mesa en o Semontano de Balbastro e que leba
trenta añatas esfendendo e luitando per a amostranza e dinificazión de
l'aragonés en a redolada d'o Semontano de Balbastro. Ista iniziatiba blinca
grazias a un ligallo de mullers d'o lugar de Buera, o Conzello de Santa Maria
de Dulzis e a colla dita. Al inte o lumero d'a alunalla apuntata blinca a buega
d'as 10 presonas e o mayestro que ferá as clases será Chaime Capablo Duerto,
mayestro de Purnas Semontano que imparte as clases en s zagueras añatas.
Chaime, que a zaguera añata fazió e superó o Diploma de Filolochía Aragonesa
impartito per a Unibersidá de Zaragoza en a Facultá d'Educazión de Uesca
s'amostra refollato de tot debán d'iste chicot trango: " Ye importán
plegar t'os lugars d'a redolada, cada begata soi más seguro de que a chen ye
dispuesta a aprender l'aragonés, no más fa falta meyos, motibazión e uellata
positiba ta concarar a reyalidá d'a luenga, con isto platero a chen se'n puya
t'o carro e da ra cara".
Iste curset de grau d'iniziazión se ferá os miercols a ras
18.00 oras en o Zentro Multiusos de Buera. Prenzipiará o dia 2 d'otubre e
rematará en plegar ta mayo. Ye de baldes e soz toz convidatos a bi amanar-tos.
A colla Purnas Semontano tamién tien unatra autibidá ta
empentar iste agüerro, en Balbastro s'impartirá un curso de grau 2 ta continar
treballando con l'alunalla que istas zagueras añatas ha penzipiato o suyo camín
en l'aprendizache de l'aragonés.
Chaime Capablo Duerto,
Purnas Semontano
No hay comentarios:
Publicar un comentario