O pasau sabado 20 d’otubre remató
a esposizión “1982-2012, 30 añadas fendo l’aragonés” que o Ligallo de Fablans
de l’Aragonés ha feito con a enchaquia d’a zelebrazión d’o suyos 30 años de
esistenzia dende a suya fundación en aquer luen agüerro de 1982, esautamén o
diya 24 de setiembre d’ixe año. A esposizión s’ha feito en a Casa Morlans, en a
plaza San Carlos, con una graniza asistencia de sozios, amigos y chen intresata
en a luenga y cultura aragonesa.
Mientres os diyas que ha estau
ubierta a esposizión han pasau por a mesma barios d’os miembros fundadors ta rezentar
con charradas cómo estioron os prozesos de fundazión y desembolique de Fablans.
Ta rematar a mesma, Ricardo Párraga “Chiri”, charró d’una d’as autibidaz en as
que a Colla Chobenil d’a Fabla –simién d’o que un mes dimpués estaría Ligallo
de Fablans de l’Aragonés- estió parti y que estió a conoixita “Esnabesada
pirirenca, conoixer o Pirineo ta esfender-lo”. En a charrada, Chiri rezentó os
preparatibos d’a gambada asinas como un camatón de mazadas que pasoron mientres
os 15 diyas que duró a esnabesada: Estricalle de l’autobús que lis puyaba de
Zaragoza ta Torla cuan yeran a lo canto d’Arguis, que una nuei lis cremaron o señal
d’Aragón, que en o lugar de Bonansa les rezibió un pastor que se diz Marcelino
Iglesias, as paellas bechetarianas de Chiri, partius de “zumbol” contra os
equipos d’os lugars, dibertius bailes olandeses, etc.
Grazias a o suyo estraordinario archibo grafico amostró gran cantidá de fotografías, pegallos y mapas con os que estió dando imachen a la suya charrada. Y tamién un importan treballo de replega de prensa d’antis en a que se feban eco d’a gambada. A la charrada asistioron, amás, atros fundadors d’o Ligallo que tamién partiziporon en a esnabesada por o Pirineo como son Miguel Ángel Pérez Gil, Miguel Ángel Martín Pardos y Fernando Romanos. Con os recuerdos de toz ers, refizioron un polito ecaizimiento que anque muitos de nusatros no lo imos bibiu, ye parti d’a istoria biba de Fablans.
Antonio Brosed y Chuanchu Pérez.
Redazión d'o blog.
No hay comentarios:
Publicar un comentario