En recuerdo de Chusé Miguel Muñoz.

L’atra nuei veyeba un conzierto en a plaza o Pilar con as “viellas glorias” de a mosica folk en Aragón. Recordemos cantas de autors vivos os mas y belún ya muerto.

En as añadas 70, con ixo que enzetaba la democrazia, muitas y muitos echón á sentir a libertat en os cuerpos suyos. Á unos lis dio por os dreitos sozials, á otris por a cultura y á otris no lis dio por cosa. D’istos zagueros, unos no teneban intinzión de cambe ar brenca pero otris encara no sabeban cómo.

Chusé Miguel Muñoz Marta, estoi que yera d’istos zagueros. En aquella puenda l’ombre teneba atras nesezidaz que poner-se en istas dembas. Igual s’alzaba las fuerzas pa dimpués.

O tresorero de Fablans Zaragoza naxió en 1949 en Miedes, un lugarón amán de Calatayud, eredero dreito de as zagueras bocadas de a cultura tradizional real, chusto cuan empezipiaba la mecanización de o campo y o esbazie de os lugars. Se’n baxaba de choven á estudiar ta Calatayud y sabió colocar-se en a banca, pero en Barzelona. También sofrió a nesezidat de marchar pa vivir. Dimpués d’una larguiza puenda de vivir astí, se’n tornó t’Aragón y ya no salió pas de Zaragoza.

Casau con a sozia Mª Jesús Casas Casas, tenió dos fillos. Santi y Alexandro, ecspresident y mayestro d’aragonés.

Solo que cuan o destino lo dezide fas o que te pertoca. No fa que bellas diez añadas Chusé Miguel y Mª Jesús plegón en Fablans arrozegaus por Alexandro, que teneba intrés por a lengua nuestra y fito fito, plegó en a tresorería de l’asoziazión. Ombre de cuentas con perras y de talento, sabió resuzitar Fablans por dos vezes fendo geribetes con os diners á l’estilo suyo, con dezisión y enzierto. Nunca no me cansaré de dizir que ha siu a persona alazetal de Fablans en as zagueras diez añadas. Si no por el, soi convenziu que abriamos zarrau ista asoziazión mas d’una vez. Eterno será l’agradeximiento mío ta el y ta toda la familia suya. No desaxero pas si digo que ye estada una pieza alazetal anque en a mosquera en lo tocante á la cultura en aragonés d’istas zagueras añadas. Atras personas son estadas mas visteras sobre os eszenarios u escribindo libros. Escribir en os libros de cuentas tamién ye un arte si se sabe fer con talento y el lo feba bien y con ixe arte que no entenemos toz, sisquiá os cantadors u os poetas. Imposible empentar a cultura entre malfurriadors y d’astí a importanzia de o suyo treballo, cutio y platero.

Y anda, que no emos reñiu por as cosas d’Aragón, cadagún con a suya envista. Que si as grafías, que si os matutans que no fan que malmeter, que si Aragón, que si Cataluña, que si España, que si Alemania, que si as troncas, os cursos, os sozios... Pero con os amigos, siempre se riñe de buen implaz.

A realidat ye que ya no te vaga de reñir mas ni d’estar en as chuntas directivas ni fer-te cargo de l’iva y ixas cosas. No pases pena, que belún lo ferá por tu. A faina tuya no será de baldes.

Ista tierra no zarrará os güellos porque as personas que seguimos aquí, sientiendo y treballando no lo permitiremos pas. Aora Labordeta te dará la brasa día par d’otro. Da-li saludos de parti nuestra.

En aquel conzierto sintié ista canta y m’alcordé de tu. [sentir a canta]

O amigo nuestro será en o velatorio 12 dende as 11 de o maitino de hue domingo 14 y o entierro lo zelebraremos en a capilla 3 á las 9:30 de o lunes 15

Chan Baos, President de Ligallo de Fablans de Zaragoza.