TRONCAS DE NADAL - 2014

A tradizión aragonesa replega ritos tan antigos como a Tronca de Nabidá. Un costumbre encara bibo en muitos fogars, an que a fiesta de a Nabidá no s'entiende sin iste auto. A natura biba, o fuego, o fumo, a zenisa, a maxia, a familia, s'achuntan de traza espezial en a Nuei Buena y en os diyas de dimpués. Dende fa trenta añadas Ligallo de Fablans de l'Aragonés ha prebau d'amostrar a cultura tradizional. Á partir de os nobanta, amostramos a tradizión nadalenca por lugars, ziudaz, escuelas y atros puestos an que nos claman. A representazión tiatralizata de o rito de o Tizón de Nabidá tiene que baler ta que a soziedá aragonesa remere u aprenda iste costumbre propio nuestro y lo reproduzca en casa suya, si no con fuego en o fogar, sí con un tizón que reparta os presens de Nabidá. Ya ye prou d'imbasión de chonflos bestius de royo.

Esferens entidaz han contautau en iste cabo d’año 2014
con nusatros t’amostrar a Tronca de Nabidá á os suyos escolanos, sozios u críos de a redolada. Ya confirmatas en tenemos:

- Biernes 19 Abiento 08:30, Escuela Baldefierro (C/ Sagitario, 5). Zgz.

- Biernes 19 Abiento 18:00, Asociación de comerciantes de l'Actur (C/. Ildefonso Manuel Gil). Zgz.

- Sabado 20 Abiento 12:00, Roseras d´a Canal (Pza. Beethoven/Pza. J.S. Bach.) Zgz.

- Sabado 20 Abiento 17:00, Escuela Baldespartera (C/ Volver a Empezar, 7). Zgz.

- Domingo 21 Abiento 12:00, Arcosur (Pª. De los Arqueros/Dolmen de Tella). Zgz.

- Martes 23 abiento 09:15,  Escuela Montecanal,  3 representaciones, (C/ Tomás Lezaun, 15). Zgz.

- Sabado 27 Abiento 18:00,  Buxaraloz.

- Domingo 28 Abiento 16:30, Diversabi (Pabellón poliesportiu, Plaza de la Constitución). Samianigo.

- Lunes 29 Abiento 17:00, Palazio de Congresos  de Uesca.

- Biernes 2 Chinero 17:30, Zentro Zebico Santiago Escatín Otín (C/. Gibraltar, 24), Uesca.

- Sabado 3 Chinero 17:30, Zentro Zebico Santiago Escatín Otín (C/. Gibraltar, 24), Uesca.

Contratazión y prensa en 692 637 391

Chan Baos,

Presidén de Fablans Zaragoza.

------------------------------------------------------------------------------------------------------------------------

A TRONCA DE NABIDÁ 

A tronca ye una tradizión aragonesa de Nabidá. Ye a toza más gran de a leñera, alzato esprés ta ista fiesta. Gosaba estar buedo u con bella radera ta alzar en a suya corada u arredol os presens que se i repartiban en a Nuei Buena.

Cuan se ficaba en o fogar yeran os ninos os encargaus de fer soltar a carga á base de trucazos repetius, que chunto á las mazadas, bendizions rituals y as purnas que con cada trucazo saliban de o fuego yeran a calor familiar y maxica d'una fiesta anzestral como la de o solstizio d'ibierno.

Con a marcha rural ta las ziudaz, ista tradizión, como o resto de de a cultura popular, cuasi que desaparixe sin dixar rastro.

Queremos embitar-te á recuperar con nusatros ista polida alternatiba aragonesa á Papá Nöel, y ficar en casa buestra atra bez a Tronca anque sólo se prete fuego que en os buestros prexinallos... anque si entenez fogaril y chaminera, muito millor!

Cómo zelebrar güe a Tronca de Nabidá.

Troba una toza xuta (u simplamén una taja, u bella emitazión de zuro de belén). En a Nuei Buena la pones en o fuego (si no entiens fogar, adorna-lo bien en o puesto de l'árbol de Nabidá).

Antis, amaga en os cados y raderas de a tronca nuezes, almendras, mandarinas, carambels u mensaches que indiquen an se i troban os presens que no i cullen aintro.

Con un porrón u sólo que con os didos mullatos de bin (u naranchada) fe bendezir a tronca á la familia, más que más á os ninos, con una formula que puedes improbisar u atra como ista:

Tronca de Nadal yo te bendizco

en o nombre de o Pai, de o Fillo,

y de o Esprito Santo, Amén.

Se debanta o porrón y se diz, fendo cruzes:

Bebe tizón bebe porrón,

tu por a boca y yo por o garganchón.

Con un tocho, se truca a tronca mientres que se rezan os deseyos de prosperidá ta la Casa como istos u los que t'imbentes:

Güen tizón, güen barón

güena casa, güena brasa

Dios mantenga a l'amo

y a la dueña d'ista casa

Buen tizón, buen barón

buena casa, buena brasa

que Dios conserve

a los amos de sta casa.

Os estacazos se i reziben con goi mientres que os presens amanixen d'aintro de a tronca y de arredol.