O venient 26 d'abril emos organizau dende una colla de chen choven d'o lugar una chornada pa trobar-nos entre la chen que fablamos y que emos interés por l'aragonés en Chaca. Asobén bi ha chen que sape charrar l'aragonés en Chaca pero no lo charramos porque no emos costumbre de fer-lo servir entre nusatros, por ixo, ta conoixer-nos, perder a verguenya y charrar emos organizau un ixambre d'actividaz ubiertas. Mesmo si nomás charraz castellán pero tos fa goyo sentir charrar tamién podez venir, ¡de seguras que lo replecaz bien!. Tamién cualisquiera d'a redolada o mesmo de atras partis puede venir si l'agana, ¡prou que sí!.
De maitins puyaremos ta Vellanuga ta vesitar a quesería "O Xortical" y lugo mos posaremos en un merendero a minchar d'alforja, antimás a las 18.00 oras feremos a presentación y estreno en Chaca d'o documental sobre l'aragonés hue "Anvistas/Ambistas" con la suya directora Iris Orosia Campos. O documental tendrá sobtitols en castellán.
Iste ye o programa d'o diya 26:
11.00 Plegada y presentación (Acicate, carrera ferrenal, 16)
12.00 Vesita a la quesería O Xortical (S'organizarán autos ta puyar ta Vellanuga). O quesero mos amostrará como fa formache (en aragonés)
14.00 Chenta d'alforja
18.00 Estreno d'Anvistas / Ambistas + Charrada con a directora Iris Orosia Campos (Acicate). (Aragonés con sobtitols en castellano)
*Y dimpués mos feremos un tragué en La Cadiera
Todas as actividatz son de baldes, si puyaz a la vesita ta la quesería cal ninviar un email ta chacacharra@gmail.com u trucanos a iste numero de telefono (691.305.169) y decir tamién si tenez auto u no ta levar a más chen ta Vellanuga.
Muitas grazias, tos asperamos o diya 26! Estatz totz convidaus a ista chornada!
Anchel Reyes,
Chaca Charra
No hay comentarios:
Publicar un comentario