Deziocho añadas acudindo ta la Feria de o libro aragonés de Monzón ye estau un goi que solo se supera que por aber enzetau iste proyeuto chunto con Chorche Paniello.
Allora, Fablans lebaba una linia d'edizions que se curtó en 1998 con La bal de la vida, de Elisa García. Continamos con a faina de A Botiga de Fablans, an que ufrimos a mayor ufierta de libros en aragonés y de cultura aragonesa de o planeta.
A presenzia de a cultura en aragonés contina firme en Monzón con editorials como Prames, Gara, Rolde, CFA, Mira... Desgraziadamén, iste ye un mercau minoritario que no fa guaires bendas, contimparau con o global de a Feria.
En as zagueras añadas, ista asoziazión ha puesto fer caxa grazias á la benda de materials que no yeran propiamén libros, pero entendemos que en una feria de libros cal bender libros, más que más.
Semos cosziens que a feria ye un escaparate prou importán y quienes bi son tienen una oportunidá mayor de bendas en toda l'añada, pero ista asoziazión cultural no puede fer a imbersión de a logadura de o puesto y a manutenzión de a persona que i ye porque ya sabemos que no cubriremos os gastos con a benda de libros.
Asina que por a custión economica, pero más que más por no poder vender os articlos que nos dan o benefizio, sentimos asaberlo no poder estar en ista edizión de a Feria d'o libro aragonés. Os nuestros cliens y amigos nos tienen á man en www.abotiga.com ta mercar y beyer l'orario de a botiga fesica en Zaragoza.
Continamos balurando muito positibamén en Fablans Zaragoza a faina de tot o personal de a Istituzión Ferial de Monzón por a cultura aragonesa y recomendamos a besita de os nuestros sozios ta que faigan gasto. Seguiremos á la disposizión de a IFM y de o Conzello de Monzón ta futuras colaborazions, sabendo l'intrés d'ista ziudá por a cultura en aragonés.
Chan Baos,
Presidén de Fablans Zaragoza
No hay comentarios:
Publicar un comentario