CHARRADA DE OS ZERRIGÜELTAIRES

D’a mesma traza que se ye fendo iste año, Fablans continó zelebrando as suyas trenta añadas de bida, iste zaguer biernes, con o suyo ziclo de charradas de sozios y esc-sozios de l’asoziazión que han estau binclaus a la luenga aragonesa muito dillá d'a suya pertenenzia a Ligallo. Asinas han pasau por istas charradas presonas de reconoixiu prestichio aintro d'o mundo de l'aragonés y, como no podeba estar d'atra forma, en ista ocasión nos acompañoron Migalánchel Martín Pardos y Miguel Ángel Pérez Gil, conoixius como “Os Zerrigüeltaires”.

Istos trestalloron a charrada en cualques “trampos” como si estase una nabata d'a bida en a cuala dos chobens de bente años que se conoixioron en un curset d'aragonés astí por l'año 1982 esen, y encara agora, estau manullando en istos trenta años. A suya naxedura como “zerris” tien puesto en a esnabesada pirinenca cuan en Añisclo sienten charrar por primera begata aragonés pirinenco y patrimonial.

Una d'as primeras cosetas que nos querioron deixar esclatero estió que els no son istoriadors, profesors u filologos y menos encara academicos. Els son espertos en “Zerrigueltadas” y que o suyo metodo de replega ye “rozero”, de zercanía y amistá. Nos contoron que, sin garra mena de planificazión ni organizazión, replegaban en libretas, cuadernos y grabazions d’esferens calidaz toponimos, cantas, costumbres y más que más ditos en a bariedá local d'os puestos que besitaban. Cualques d'istas grabazions estioron más adebán recullidas en dibersos articlos que se publicoron en as rebistas “Orache” y “Jacetania”. Nos contoron cómo de chobens eslampaban cuantas begatas a l'año ent'o pirineo, pero que más adebán por o treballo, familia y demás estioron espaziando istas “zerrigueltadas” encara que fendo-ne a lo menos una por año y mesmo marchando por deseparau a diferens puestos enamplando a zona de replega d'o pirineo a tot Aragón.

No faltoron en a charrada mazadas curiosas como o casorio de Miguel Ángel Pérez que estió lo primer casorio zebil en aragonés, o testimonio d'a zaguera prersona d’Ansó que bestiba perén de calzón, cantas d'o pastor d'Andorra, etz.

A charrada la acompañoron de lumerosas fotografías y audios en os cuals fazioron un granizo repaso por toz os puestos por do eban pasau y de toz os testimonios que han replegau en toz istos años. En zagueras, ta rematar a charrada, presentoron un poliu bidio-omenache en o cualo amaneixen totas las presonas que conoixioron en istas “zerrigüeltadas” y que han feito posible o gran fichero documental que han creyau.

Antonio Brosed y Ricardo Párraga

Redazión d'o blog.