CHARRADA DE CHUSÉ ARAGÜÉS

Ligallo de Fablans contina con as suyas autibidaz de zilebrazión d’as trenta añadas de esistenzia de l’asoziazión que ye fendo arredol d’a esposizión “1982-2012, 30 añadas fendo l’aragonés” y que ye mesa en Casa Morlans dende o pasau 24 de setiembre y que ubrirá as suyas puertas dica o 20 de otubre.

Una d’as lumerosas autibidaz que se i son fendo son as charradas feitas por barios d’os miembros fundadors de Ligallo. Si ta la debantadera teniemos a Fernando Romanos, o lunes 1 d’otubre estió o turno de Chusé Aragüés. Iste mos charró de muitas d’as cosas que i eban pasau, y que s’eban feito, en l’asoziazión mientras totas istas añadas en os que estió parti d’a mesma y perén, cosa que dixó esclatera dende o prenzipio, dende a suya ambista . Mos fabló de cómo remato en o Ligallo, d’as publicazións que editó l’asoziazión, d’a traza como se plegó en o lumero masimo de sozios y d’as posibles razons por as que ista zifra baixó, de luitas internas y presonalismos, de cosetas que prebó de fer Fablans como estió lo feito de querer mercar bel casalizo en Echo ta que se i podese fer una escuela d’estiu, etc, Entre mazadas, remeranzas y istoria de Fablans, Aragüés querió dixar prou marcau espezialmén dos cosas: sozializazión y dreitos. Sozializazión como un d’os granizos quefers, puede estar que o más granizo, que ha feito Ligallo de Fablans en totas istas añadas de bida. Y ye o treballo de dar a conoixer l’aragonés y fer-lo bistero ta tota la poblazión d’Aragón, y d’o mundo, que no teneba conzienzia d’o mesmo. Bella cosa, como biyemos en a charrada d’o enguero d’a esposizión, en o que ye de raso d’alcuerdo con Fernando Romanos; Y de dreitos fabló sobre quí tien más dreitos en l’aragonés. Si os, ta él mal clamaus “patrimonials”, si os “neo-fablans” u, como él creye, toz o mundo ya que un idioma ye un bien unibersal. Anque dizió que, dica fa bels pocas añadas, toz os estudeos, normalizazións, dinnificacións y esfensa d’a luenga aragonesa eban estaus feitos por chen que no teneba l’aragonés como o suyo idioma materno.

O benién diya 20 d’otubre Ricardo Párraga “Chiri” mos i fablará de tot o que pasó en a “Esnabesada pirinenca en esfensa de l’aragonés”.

Antonio Brosed y Ricardo Parraga

Redazión d'o blog.