O pasau lunes 24 de setiembre s’enzetó
a esposizión “1982-2012, 30 añadas fendo l’aragonés” que Fablans Zaragoza ha
meso en casa Morlans con a enchaquia d’a zilebrazion d’o suyo trenta cabo
d’año.
L’autibidá s’enzetó en a siede de
l’asoziazión aon s’achuntaron una buena colla de sozios y amigos ta fer una
ronda y una apegada de cartels d’antismás de camín ta casa Morlans, remerando los
tiampos en que ista yera una d’as poquetas trazas que teneba o mobimiento
asoziatibo ta dar a conoxer as suyas autibidaz.
O recorriu se fazié en una morfuga de borina y, como no podeba estar d’atra traza, estioron alcompañaus por os gaiters d’o Camino Viejo entremistanto zerculaba un granizo capazo de lamins y s’amortaba la seteguera con bin abocau en o porrón
Una begada en casa Morlans y zaga
la inaugurazión d’a esposizión se fazié a primer d’as charradas prebistas en o
tiempo que sia ubierta la muestra. Fernando Romanos, miembro fundador de
Ligallo de Fablans de l’Aragonés fabló d’o prozeso de fundazión de l’asoziazión
cultural. Romanos charró cómo una colla de chobens con nomás de quinze añadas enzetaron
un camín en esfensa d’a luenga aragonesa con o pelegrinache por asabelo de
puestos dica la fundazión d’a Colla Chovenil d’a Fabla y d’as azions que
tenioron que fer, a begadas muito discutius, no ta amostrar a luenga aragonesa,
sino simplamén ta que a ziudadanía tenese conzenzia que bi esistiba un idioma
propio d’Aragón. Dimpués de dos añadas d’esistenzia d’a Colla, y ta que podese
dentrar tota la chen, estiese choben u no pas, nazié ya d’una traza legalizata l’asoziazión
Ligallo de Fablans de l’Aragonés. No sin muitos más poblemas como estie o feito
que no teneban añadas sufiziens ta poder lebar os estatutos ta o
rechistro.
Dica o 20 de nobiembre se ferán más charradas como la de Chusé Aragüés o diya 1 d’otubre, u o diya 20 d’otubre de Ricardo Párraga “Chiri”.
Antonio Brosed y Ricardo Parraga
Redazión d'o blog.
No hay comentarios:
Publicar un comentario