RUFIERTA ARAGONESA N'A TABIERNA D'O BICO - DICIEMBRE'11

Buen día, tardi, nuei a totz y a todas. Ya s'alufra por l'orizón a rufierta d'abiento. Y ye que malas que uloro ixas calendatas me dentran unas ganas de cantar billanzicos y minchar turrons que ye que me torno barrenau. Bos dixo una muestra (de billanzico, que o turrón ye pior de nimbiar por e-mail) ta que beigaz que isto d'o Nadal me fa buen prebo. Si querez, busatros podez adibir-ne d'estrofas u cantar-ne unatro. O que bos pet ...e. U tocar o pandero, que tamién ye autibidá nadalenca, u a botella d'anís... (bueda, que plena bos la zorrupaz). Bueno, astí ba. Si i trobaz erranzas u arritmias, no ye culpa de yo. Ye que cuan se repartió o sendito mosical, a yo me tocó o rudio.

San Chusé yera fustero,
feba finestras y puertas,
y os primers chuebes de mes
marchaba ta las rufiertas.

Ande, ande, ande,
charra chistabino,
ande, ande, ande,
cheso u tensino.

A birchen se diz Marieta
y naxió en Ribagorza
y feba malas pachas
con San Millán de la Cogorza.

Ande, ande, ande,
charra aragonés,
ande, ande, ande,
pandicuto u patués.

O Nino baxó a l'infierno
a fablar en ansotano
y beyó que en ixe puesto
se fablaba castellano.

Ande, ande, ande,
fabla con argüello,
y a os que no te dixan,
ostias a caramuello!!!.

Os Reis Magos d'Orién
entibocaus se creyeban:
que ixo no ye Belén...
Sí que ye, pero ye a Esteban!!!


Ande, ande, ande,
Quí mete barraches?
Anda, anda, anda,
ye Luisa Fernanda.

Bueno, pos ixo, que qui quiera continar cantando que s'amane o chuebes, día 1 d'abiento, entre as 19:30 y as 21:00, alto u baxo, por o puesto que ya conoxez, o Bar Somport, en a carrera García Sánchez, 34. O caba lo bosa l'Utebero y o guirlache Bastián.

Ta saper-ne mas puncha aqui: RUFIERTA ARAGONESA N'A TABIERNA D'O BICO

Fuente: Facebook de Chesús L. D.