CONCURSO “PROU, PROU, LUEN” EN ARREDOL.COM

Agora que s’amana o puent d’a Nueit d’Animas tos queremos proposar una coseta. Si n’itz enta os vuestros lugars, a Kuala Lumpur, a Kampala, Londres u Marrakech, queremos veyer o mesmo que veyetz vusatros. Por qué? Porque nusatros no mos n’imos de vacanzas y remaniremos aqui ta portar-tos a información. Prou que no han d’estar fotos nomás d’iste puent! Si has iu de vacanzas en estiu, u lo que te vaga ye de amostrar-nos a tuya ciudat, vico u lugar, tamién puetz fer-lo.

As fotos que recibamos las iremos puyando en a web y se’n podran votar. Y o premio? O premio son libros! Libros! pero no libros cualsiquiera. A os cinco primers lis regalaremos un eixemplar de “Prou, prou, luen” o libro-disco de falorias meyoambientals de Tamara Marzo y Carlos García editau por Ara Cultural. Os cuentos tienen as voces de Eduardo Lolumo, Antón Castro, Jorge Asín y Fran Fraguas de Oregón Tv y atra muitisma chent.

Istas son as bases.
-Puede partecipar cualsiquier presona con no más de 3 fotos por presona.
-As fotos pueden ser de cualsiquier epoca de l’anyo y de cualsiquier puesto d’o planeta (u de difuera, si ye que has estau en a luna, por eixemplo).
-Habras de ninviar a foto (d’un tamanyo no más gran de 500 kb) ta info@arredol.com con l’asunto “Concurso prou, prou, luen”. Habran de constar o tuyo nombre y apelliu y un e-mail y telefono de contacto.
-A foto habrá d’estar alcompanyada d’una chicota descripción, d’o puesto an que s’ha feito, más que más, si puestar, en aragonés.
-As fotos s’emplegarán ta o concurso y no más que ta o concurso y os suyos dreitos, etc, seran d’a presona que ninvie la foto.
-As fotos que mos ninvietz se publicarán en una pachina adedicada a ello an que se podran votar.
-O plazo de presentación de fotos remata o 20 de noviembre, en que prenciparan as votacions, dica o 6 d’aviento.
-As fotos ganaderas se daran a conoixer o 7 d’aviento.
-O premio ta las cinco primeras fotos ye un eixemplar d’o libro-disco de “Prou, Prou, luen”, gracias a l’amabilidat d’Ara Cultural.

Muita suerte!

Fuente: www.arredol.com