PRIMER CABO D’AÑO D’O BLOG

O diya 13 de Marzo de 2011, o blog de Ligallo de Fablans de Zaragoza ha feito una añada dende a suya primera publicazión. O que prenzipió como una charrada a ran d’a colla de treballo de secretaría ta puyar-se-ne a o tren d’as nuevas teunolochias y estar un punto de información d’as autibidaz d’o ligallo, ha rematau estando un proyeuto pincho e intresán ta l’aragones ya que se’n ha íu dilla e imos prebato de creyar un puesto an que trobar ascape totas as notizias, testos, nobedaz y alparzeos que chiran arredol d’a luenga aragonesa.

Dende a primera publicazion, tetulata “Testo de preba (trobao en a rete)” dica güe diya, s’han publicato 254 articlos. En istos articlos se han tratato toz os temas, dende as autibidaz propias de l’asoziazion y d’a colla de teyatro Renaxedura dica os delicaus temas d’as ortografías y academias; Dende os articlos publicatos n’os periodicos tradizionals dica os post d’atros blogs y webs; Dende as autibidaz d’a resta d’os ligallos dica as notizias que i plegaban de cualsiquier atra asociación; Dende as nobedaz mosicals y editorials (grazias a ra colaborazion d’a botiga de Fablans) dica os premios y concursos literarios.

Profes que intes difizils en ha abíu, pero no por o treballo que leba o blog, sino por dezisions que abiemos de prener en o suyo diya. Foi referencia a o feito de tener que zensurar y betar bels comentarios feitos en o blog por diferens presonas. Enzetando, preniémos a dezisión de que a qui le fese goi, podiese añadir un comentario en cualsiquier articlo d’o blog. Regles no bi’n eba. Y de traza cheneral toz istos comentarios se rayaban, y rayan, con mesura. Pero cuan se tocan bels temas, ortografías y academias, bi ha chen que s’encarraña, y astí estió cuan bels comentarios remataban estando ataques presonals entre comentaristas. Con bels comentarios plens de faltas para con Francho Nagore y Manuel Castan. O como en belatro inte an que os comentarios yeran de carauter político-sozial, bella cosa que nunca no ha estau rilazionada con o Ligallo de Fablans de l’Aragones. Asinas que, a partir d’istos feitos, preniémos a dezisión de que o millor yera que toz os comentarios pasasen por un filtro prebio antis d’estar publicaus.

De todas trazas, d’as trenta y güeito besitas que abiemos en marzo de 2010, emos rematau con cuasi cuatro mil zincozientas que abiemos en febrero de 2011. En total, en 2010 abiemos cuasi 11000 besitas, y en o que lebamos d’añada, dos meses y meyo, ya semos a lo canto d’as 10000. Por o que bella cosa nos diz que no semos fendo-lo malamen. E ixo nos da animos ta continar.

Y ta rematar, remerar-tos a toz que iste ye un blog ubierto ta quien quiera. Aquel que tienga bella cosa que dizir, o comentar, o lo que le faiga goi, si ye d’a luenga aragonesa o de l’asoziazion, puede colaborar en o blog. Nomas tien que meter-se en contauto con secretaría o con yo, o nimbiar-nos o suyo articlo.

Antonio Brosed
Redazion d’o blog de L.F.Z

No hay comentarios:

Publicar un comentario