A BIQUIPEDIA EN ARAGONÉS YA TIEN 25.000 ARTICLOS

Feba agora prou tiempo que no redactaba garra dentrada en o blog, asinas que un buen momento ye hue, ta celebrar que a Biquipedia ya tien 25.000 articlos, una d'as zifras redondas que se gosa celebrar. L'articlo que fa o 25.000 ye l'adedicato a o castiello de Sibirana, en Uncastiello (Cinco Villas) y ye declarato Bien d'Intrés Cultural.

A elección d'iste articlo marca tres d'as tendencias d'a Biquipedia. En primeras, ye sobre un articlo de tematica aragonesa, una d'as nuestras tradicions, porque gosamos fer que os articlos que serán marcatos como historicos en estar zifras redondas sigan articlos de tematica aragonesa.

D'atra man, ye un articlo sobre un elemento d'o patrimonio cultural aragonés, que amás en iste caso ye declarato como "Bien d'Intrés Cultural", ye decir, iste articlo mos ufre información d'un tema important t'a Historia d'Aragón.

Y ta rematar (y no ye ni muito menos l'aspecto menos important), se tracta d'un articlo de redacción propia, elaborato por un usuario (en iste caso no importa decir qui, porque o treballo en a Biquipedia ye colectivo y obra común de totz) dimpués de consultar bibliografía sobre o castiello, impresa y por o rete. No ye pues una traducción d'un treballo alieno, porque fácil que os biquipedistas fagan parte d'a chent qui millor conoixca os temas importants d'Aragón. Una prebatina d'ixo ye que l'articlo no tien amás garra interwiki, ye decir, no bi ha garra atra wikipedia que haga teniu intrés en elaborar-ne un articlo.

Ye decir, una d'as caracteristicas d'a Biquipedia ye de treballar rigorosament, no traducindo contenius d'atros so que elaborando-ne de propios, estando asinas creyadors de contenius de tematica aragonesa (mesmo que de temtica universal) a disposición de qui en tenga intrés. No somos chent colonizata culturalment que traduzca contenius aliens y foranos, so que chent que creya contenius propios y que los amuestra, con prou argüello, en un conchunto prou homochenio de 25.000 articlos, en creiximiento de contino.

Por ixo en a Biquipedia se puet trobar articlos de muitas tematicas que no se troban en garra atra wikipedia, u que si se troban se troban poco desenvolicatos.

Y de tot ixo en deriva un aspecto conexo: a calidat d'a Biquipedia ye netament superior a la que s'asperaría d'un prochecto chicot en contimparanza con prochectos en atras luengas. Bell día charraremos detalladament d'estatisticas, pero nomás cal dar unas poquetas ta fer-mos una ideya: encara que a Biquipedia ye actualment a numero 70 de totz os prochectos por numero d'articlos, ocupa a posición 52 actualment en a Lista d'os 1.000 articlos que toda wikipedia habría de tener, a o nivel de luengas como estonio u vasco. Pero bi ha muitas mas estatisticas que amuestran ixa calidat.

Asinas, podemos veyer una lista que calcula o numero d'articlos d'una wikipedia que no se troban anisolatos, ye decir, que son cridatos por atros articlos y a la vegata cridan a atros articlos, conformando asinas un conchunto homochenio. Se puet consultar y se i veye que a Biquipedia ocupa o puesto numero 63. Ixo ye porque, encara que o treballo d'os biquipedistas no respon a garra orden superior, somos prou disciplinatos como ta elaborar os articlos seguindo un criterio d'usabilidat, ye decir, fendo os articlos que cal fer ta feu un treballo enciclopedico de conchunto en o qualo os articlos se troben enlazatos entre sí.

Una formula matematica ta calcular a "calidat wikipedica" d'os articlos ye o depth. Ye una formula complexa, a on se calcula o numero d'articlos, a suya grandaria, o numero d'edicions, etc. Ixo ye una forma de calcular o proceso wikipedico d'elaboración y millora d'articlos. Puet consultar-se ixa lista, ordenata por numero d'articlos, a on se veye que o "depth" d'a Biquipedia ye de 58. A lista ye dividita por seccions seguntes a grandaria en numero d'articlos de cada wikipedia, y a Biquipedia se troba en o tercer nivel, con as wikis que tienen de 10.000 a 100.000 articlos. Se puet ordenar aintro de cada nivel por os diferents criterios, encluyendo-ie o depth, fendo click en o simbolo que se troba debaixo de "depth", y veyemos cómo d'o suyo grupo a Biquipedia ocupa a posición numero 7, estando amás superior a quantas wikipedias d'o segundo grupo (de vegatas mesmo muit superior), que como se veye nomás fan que fer articlos chicotz ta dar una apariencia de tener muito treballo feito, quan en realidat pueden ofrecer muit poco conteniu de calidat.

Relacionato con ixo ye o porcentache d'articlos de cada Biquipedia que tienen una grandaria suficient. Ista estatistica se puet consultar, y actualment o 32,77% d'os articlos d'a Biquipedia son masiau chicotz. Ye una zifra muit buena, en contimparanza con atras luengas, que bi ha muitas wikipedias a on o 60, o 70, o 80 u mesmo o 90% d'o suyos contenius son de baixa calidat. Pocas wikis con mas de 25.000 articlos plegan en o nuestro nivel de calidat, como se puet veyer en as estatisticas detallatas de cadaguna.

Y a tot ixo, plegamos a la qüestión mas destacata: a relación entre fablants d'una luenga y numero d'articlos. Ixa estatistica la trobarás. Como a presentación ye seguntes o numero de fablants de cada luenga, l'aragonés se troba quasi abaixo de tot, en tener-ne nomás que 10.000. Pero puets ordenar a lista, fendo click en as flechas. Fes-lo en primeras en a columna d'editors por millón de fablants: l'aragonés "se sale", como dicen en castellán, d'as tablas, con 1.700 editors/millón de fablants y en a posición numero 5 d'entre todas as wikipedias. D'entre as atras luengas d'Aragón, o catalán tien 63 y l'espanyol, 8. Calcula a relación tú mesmo de quala ye a productividat d'una chicota comunidat, 200 vegatas superior a la productividat d'os fablants de castellán... Si encara no lo veyes, para cuenta de que os fablats d'aragonés, con 25.000 articlos y 10.000 fablants, tenemos una relación de 2,5 articlos por fablant. Calcula quala ye a relación entre 500 millons de fablants de castellán y o suyos 715.000 articlos. Y tot ixo tenendo amás, como hemos podiu veyer, articlos de calidat muit superior a los que se troban en atros prochectos en atras luengas.

Isto ye pues Biquipedia en aragonés.

A fotografía, ye claro, ha d'estar d'o castiello de Sibirana. Ta saber qui ye l'autor d'a fotografía, puets mirar-lo astí.

Fuente: http://manueltrujilloberges.blogspot.com