1 hora extraescolar no ye prou pa la supervivencia de l’aragonés.

As zagueras noticias y informes d’o curso 2016 -17 remarcan que en Aragón estianyo se va a impartir clases en un alto numero de lugars, con si fa u no fa 27 puestos de l’Alto Aragón. A novedat proviene de que mesmo en tres puestos Pandicosa, Benás y Baixa Ribagorza se inicia un prochecto novedoso con inmersión, encara que con nomás bellas 12-13 horas, en aragonés en atra asignatura.

O mesmo camín ya estió encetau fa mas de 30 anyos por o catalán en Aragón, integrau en o currículum educativo (20-30%) de bells centros, en inmersión, en a mayoría como asignatura y que iste curso contará con 4.471 alumnos. Con tot y con ixo una plena ufierta d’inmersión ye reclamada por expiertos como unica traza de supervivencia.

Manimenos, “Esfendemos as luengas” viene a denunciar lo que dende muitos sectors se ha veniu a clamar como un logro d’o movimiento por esfensa de l’aragonés y d’a nueva DGPL d’Aragón. A impartición d’istas clases no deixa d’estar que os ixallos d’una ensinyanza que no va a incidir mica en a capacitación d’os ninos como charradors d’aragonés.

A numero d’alumnos/as oscila entre 625-808 seguntes as fuents, a gran mayoría en Primaria, encara que tamién en Infantil y 10 en Secundaria. A realidat ye que gran parti d’istas clases son impartidas en horario extra-escolar, 1 hora semanal, y en o millor d’os casos como optativa.

13 mayestros son os encargaus d’impartir as clases d’aragonés, con un furo treballo que no puede tener as conseqüencias asperadas; horarios desafortunaus, oposición d’atros mayestros d’os mesmos centros, duración limitada d’as clases,..

En aviento de 2016 se presentaba en Sant Sebastián o Protocolo pa la Guarencia d’as luengas minoritarias en Europa. En ixe Protocolo amaneixe como uno d’os puntos fundamentals a ufierta de clases en modelo d’inmersión total, con horario completo escolar y con aduya plena de materials pa ello. Dende l’anvista d’os recursos humanos, ista amostranza habría de contar con plazas y formación de mayestros prou como pa cubrir ista requesta.

Tos deixamos una chicorrona muestra d’a realidat d’os ninos/as que reciben clases d’aragonés, a tamás de l’esfuerzo de mayestros/as: vimeo.com/209281078

Fuente: arainfo.org

No hay comentarios:

Publicar un comentario