MANIFIESTO D'A XII BORINA POR L'ARAGONES

Güe, buena cosa d’as personas interesadas por a promozión y conservación d’o patrimonio lingüistico aragonés nos emos achuntau como benimos fendo en Zaragoza dende fa ya 12 añadas.

Son estadas añadas d’intensa luita y demanda de dreitos, pero tamién ye estada una puenda en a que cadagún emos enamplau, a trabiés d’ista luenga, as nuestras relazións soziáls. Tamién nos ha permitiu aprender una ripa de cosas, tanto a ran indibidual como a ran sozial, y encara ye millor de pensar en tot o bueno que ista luenga y iste mobimiento nos ha de dar.

L’añada 2010 ye marcada por a entrada en bigor d’a Ley de Luengas, d’a que muito se’n ha charrau, d’a que cal sacar tot o treslau posible, y prou que a que cal amillorar. Con tot y con ixo, ixa Ley no ese estau posible sin tot iste tiempo de treballo que dende l’altruismo una ripa de personas emos lebau fendo nomás por l’aimor a la cultura y a tristura a la perdida d’un bien tan rico, erenzio d’os nuestros lolos y espiello d’as nuestras radizes.

Ista ley puede marcar o prenzipio d’una nueba puenda ta l’aragonés, y asperemos que asinas en siga, pero tampoco no emos de perder o rumbo que ha feito que l’aragonés no bulla en os zaguérs dezenios.

Ye más, por denzima de cualsiquier documento, o que ferá que ista luenga no muera será que cadagún d’os suyos fabladórs continen fendo-la serbir sin garra medrana ni prechuizio, en todas as dembas d’a suya vida: treballo, amistaz, familia, borina... o feito d’emplegar l’aragonés en istas situazións ye más importán que cualsiquier documento y por ixo somos aquí güe.

Por denzima de cualsiquier atra cosa, somos aquí ta charrar aragonés, ta contrimostrar que ni ye muerto ni morirá y ta continar con o esprito que tan buens resultaus ha dau, ta fer serbir a nuestra luenga con más chen y ta creyar un esprito de colaborazión contina.

Y dito isto... ¡Toz a borinear en aragonés!

XII BORINA POR L'ARAGONES




A XII Borina por L'Aragones se celebrara en a Peña "Os Chachos" o diya 26 de marzo a ras 7.30 d'a tardi. A peña se troba en a carrera Santa Rosa (Bocacalle de Privilegio la Union) en o bico de San Chusé.

O cartel d'autuazions será o binien:
-19.30 As cartas d'a Lola Bisi.
-20.30 Gordobordon.
-21.00 Danze d'o gancho.
-22.30 O yayo bolador.
-23.00 Chusebinos Folk.
-23.30 Guariche.
-00.00 Lurte.

TESTO DE PREBA (TROBAU EN A RETE)

Todas as soziedaz antiguas, gosan tener una casta sozial, u mesmo bels indibiduos que, bien por estar os más esferens, bien por amostrar birtuz que otris no entienden, han estau trestallaus d'o resto de o coleutibo ta que no se esbafen os suyos conoximientos. D'ista traza, ista casta se conserba cuasi intauta dende fa muito tiempo.

Güe, chusmesos en una soziedá moderna y con nuebas trazas de bida, os ababols se beyen forachitaus de o puesto que i merexen en iste mundo. ABABOLS SIN DE MUGAS localiza, cudia y si cale, amuestra a istos sers a combibir en una soziedá cada bez más sofisticada y con menos espazio ta ers.

Por exemplo, un ababol no siente a nesezidá de reduzir o gasto de calefazión, u luz en ibierno ni de ropas en berano; asina, prefiere clabar a estufa bien fuerte y estar-se en chichetas en chinero ta poder espleitar o suyo chándal de rebaxas en chulio con l'aire acondizionau a tope. Si os ababols no esbiellan o papel ni o beire, ni escusan gasolina ni ta crompar o periodico, no ye porque ixo no siga bueno ta la soziedá, ye que ellos no pueden malfurriar o suyo tiempo en ixas cosas tan simplas.

Un ababol que s'aprezie tiene que beyer a telebisión. As franchas orarias preferidas ta iste menester son a meyodiada y ixe rato largo de dimpués de zenar. Cullebrons, concursos, deportes de sofá, reyaliti chous y programas de luzetas y glarimas desembolican o suyo inteleuto y li sirben ta recullir os sapers d'o mundo que li arrocla. Tamién os ababols emplegan istos meyos ta ufrir to mundo os suyos conoximinentos sobre a bida, os sabers y os alparzeos que intresan.

Politica. Ista casta lo tiene prou claro: A politica bale t'alparziar, conseguir poder y mesmo ta estar politicos y ganar perras. Fueras d'ixo, no tiene muito sentito inaugurar entibos, ni carreteras u poliesportibos que se i cayen solos, ni meter-se a charrar en una cambrota cuasi redonda. Cal dizir que a nuestra O.N.G. cuenta con una nutrida colla de politicos como sozios y un camatón más ye afillau a esferens partitos de totas as colors. Mesmo muitos de os botans tamién son ababols, anque beluns no son afiliatos.

A la fin, cal espardir a cultura d'os ababols por tot o mundo, que implen o planeta con a suya zenzia. Ya bi'n ha muitos, sólo que encara no saben que son espezials. Cal dizir-les que son o nuebo poder fautico d'a Tierra, que si en quieren pueden dominar o Planeta con as suyas güeñas y os suyos programas de telebisión, con os suyos autos y os recursos naturals de toz. Ista asoziazión sólo ye que t'ababols, asina que si no lo yes, u creyes no estar-ie, millor no te metas en contauto con nusatros.